The Definitive Guide to Living in the Capital , Cairo , Egypt

سواء كانت أفلام عربية أو أجنبية. حبكة سرقة البنك شوفناها كتير، حتى إننا لسه شايفين فيلم أجنبي هو Going in style واللي كان بيحكي هو كمان عن محاولة كوميدية من 3 رجال كبار في السن إنهم يسرقوا أحد البنوك.

وعلى نفس الوتيرة بيحاول صناع فيلم بنك الحظ تقديم أفلام سرقة البنوك الأجنبية لكن بشكل وطابع مصري. الفيلم كان جيد في بعض الأمور وسيء في حاجات تانية. ده اللي هنستعرضه من خلال نقدنا للفيلم.

القصة

فيلم بنك الحظ بيحكي عن مجموعة من الأصدقاء من بيئات مختلفة اجتماعيًا وماديًا وثقافيًا، وحتى على مستوى الذكاء والقدرات العقلية، لكن كلهم بيجتمعوا على هدف واحد وهو سرقة أحد البنوك الضخمة، استغلالًا لوقت بيكون فيه النظام بتاع البنك مش شغال وكل كاميرات المراقبة وأجهزة الأنذار لا تعمل.

فريق العمل

بنك الحظ من إخراج أحمد الجندي ومن بطولة محمد ممدوح وأكرم حسني ومحمد ثروت وحسام داغر و-طبعًا- بيومي فؤاد!

أما التأليف فكان من نصيب مصطفى صقر ومحمد عز الدين.

بنلاحظ على فريق عمل الفيلم بداية ظهور الفنان محمد ثروت في عدد كبير من الأدوار في الفترة الماضية، وبنعتقد أن ثروت ممكن يخرج منه مشاعر وانفعالات، أفضل من اللي بيقوم بيها في أفلام الكوميديا من الدرجة الثانية والثالثة. لكن بنعتقد إنه حصر نفسه في النوعية دي من الأدوار كنوع من أنواع ضمان الانتشار في بداية مشواره الفني.

السيناريو والحوار

كان واضح جدًا تأثر سيناريو بنك الحظ بكتير من الأعمال الأجنبية، وعلى الرغم من نجاح الفيلم في تمصير كتير من الأشياء فيما يتعلق بالسيناريو، لكن فضلت النكهة الأجنبية حاسين بيها في 90% من مشاهد الفيلم. لكن الفيلم قدر يوظف المشاهد الكوميدية الخاصة به في السيناريو بشكل جيد ومبتكر. ودي نقطة تحسب للفيلم.

أما الحوار فكان معتمد بدرجة كبيرة على الإيفيهات، وده كان من الأمور السيئة واللي أحبطتنا جدًا في حوار الفيلم، ولو اعتمد الفيلم على المواقف الكوميدية أكتر من الحوار كان هيكون أفضل بكتير.

الموسيقى والديكور

بصراحة شديدة الموسيقى والديكور مش بيكون لهم دور كبير في الأفلام الكوميدية اللي بتخاطب شريحة واسعة بيكون أغلبها من الشباب المراهق، لكن الديكورات كانت مصممة بذكاء ومستغلة علشان تنتج في النهاية صورة جيدة ومتناسقة، وبرضه الديكورات كانت مستمدة بنسبة كبيرة من الأفلام الأجنبية اللي بتتناول موضوع سرقة البنوك.

الخلاصة

لو عاوز تقضي حوالي ساعتين من الكوميديا اللطيفة مع بعض الإيفيهات.. بنك الحظ هو الفيلم المناسب لك.

علشان تبقى عارف:

فريق شارموفرز غنى أغنية الفيلم واللي كانت بعنوان Easy money .