تامر حسني قدر في الفترة الأخيرة يقدم بعض الأفلام اللي ممكن نقول إنها كوميدية، لكن للأسف في فيلمه الأخير تصبح على خير وصل لمرحلة صعبة جدًا من الاستسهال في تنفيذ أفلامه لمجرد إنه يتواجد في سباق العيد.
القصة
الفيلم بيحكي عن المهندس الغني حسام الخديوي، واللي بيعيش في مستوى مادي واجتماعي عالي جدًا، لكنه بيعاني من مشكلة نفسية بتخليه يجرب تجربة فانتازية جديدة من خلال دخوله في مجموعة من الأحلام اللي بتغير حياته وتخليه يعيد التفكير في كل تفاصيل حياته من أول وجديد.
فريق العمل
الفيلم من بطولة تامر حسني ومي عمر ونور ودرة. بالإضافة لمشاركة بدرية طلبة ومحمود البزاوي. تأليف وإخراج الفيلم لمحمد سامي (زوج مي عمر بالمناسبة) أما محمد عبد السلام فكان مخرج منفذ للفيلم.
الأداء التمثيلي
أداء تامر حسني كان هو نفس أداؤه في معظم أعماله التانيه بدون اختلاف كبير. كذلك مي عمر حسينا إن وجودها في الفيلم كان مجرد تحصيل حاصل بدون أي إضافة جديدة، أما درة ونور فوقع عليهم عبء الإدارة الدرامية للأحداث وقيادة السيناريو للمنطقة المطلوبة منه بالظبط، بينما كان عبء الكوميديا موزع على جميع المشاركين في الفيلم. وللأسف مكانش فيه هناك كوميديا تذكر!
السيناريو والحوار والإخراج
سيناريو الفيلم كان بيعاني من بعض المشكلات، وزودها أكتر مونتاج الفيلم اللي كان فيه كتير من الأخطاء، أما الحوار فكان المفروض يكون كوميدي من خلال جرعة الإيفيهات الكبيرة اللي كانت فيه لكن في النهاية الإيفيهات كانت قديمة ومستهلكة ومكانش فيها كوميديا تذكر.
الديكور والموسيقى والصورة
ديكورات الفيلم كانت جيده جدًا، والصورة كانت دايمًا مشرقة ومفعمة بالألوان ودي نقطة تحسب للفيلم. كمان الموسيقى التصويرية والأغاني كانت مميزة، وبشكل عام العوامل دي تعتبر – للأسف – نقطة القوة الوحيدة في تصبح على خير.
الخلاصة
تصبح على خير مش أفضل أفلام العيد ومش أفضل أفلام تامر. لكن محبي المطرب المشهور هيدخلوا الفيلم وهيعجبهم بسبب إعجابهم وحبهم لبطل الفيلم تامر حسني.
علشان تبقى عارف: الفيلم يعتبر ثاني فيلم لمحمد سامي في موسم عيد الفطر 2017 بعد فيلم جواب اعتقال.
أكتب تقييم
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
