The Definitive Guide to Living in the Capital , Cairo , Egypt

المنطقة العربية بشكل عام ومصر بشكل خاص من المناطق اللي بتعالج كتير من مشاكلها السياسية والاجتماعية من خلال السخرية والكوميديا، ومن قديم الزمان والكوميديا أثبتت قدرتها على البقاء.

واليوم ومن خلال فيلم دعدوش بنشوف محاولة ساخرة لانتقاد جماعات التطرف الديني، تعالوا نتعرف على الفيلم عن قرب.

 

 

القصة

الفيلم بيحكي عن شاب بيجد نفسه فجأة منخرط مع تنظيم إرهابي متطرف، بعد ما بيشوف إعلان هزلي على الأنترنت بيدعو الشباب للانضمام للجماعة المسلحة، ومن خلال انضمام بطلنا للجماعة بنشوف الوسائل اللي بتتبعها التنظيمات المتطرفة علشان تضمن ولاء أفرادها، لكن كل ده في إطار من الكوميديا والسخرية.

 

 

فريق العمل

دعدوش من بطولة هشام إسماعيل وميرهان حسين ومدحت تيخا وأيمن أبو زهرة وياسر الطوبجي والفيلم من إخراج عبد العزيز حشاد وتأليف ساهر الأسيوطي.

 

 

الأداء التمثيلي

على الرغم من أن فكرة الفيلم جيدة لكن تنفيذها كان ضعيف، وخاصة على مستوى الأداء التمثيلي اللي كان متواضع وغير مؤثر، وكان واضح أن الممثلين عندهم خلط بين الكوميديا وبين الاستهتار بالمشاهد الخاصة بهم، علشان كده ظهر الأداء التمثيلي ضعيف وكان محتاج زيادة دعم من الإخراج والسيناريو.

السيناريو والحوار والإخراج

سيناريو الفيلم غير ممل وبينقلنا من مشهد للتاني بسرعة وسهولة، لكن الإخراج كان عنده مشكلة حقيقية في توظيف عناصر الفيلم لخدمة الكوميديا اللي كانت ضعيفة وغير مؤثرة وغير مضحكة في كتير من المشاهد.

 

 

الديكورات والموسيقى والأزياء

من الصعب أننا نناقش موسيقى وديكورات فيلم زي دعدوش لأن الاهتمام بالعناصر دي كان أقل ما يكون في الفيلم وده من الأمور اللي بناخدها على الفيلم وصناعه، وبشكل عام الفيلم لم يكن بالقوة اللي كنا نتوقعها على مستوى الديكور والموسيقى والأزياء.

الخلاصة

دعدوش فيلم فكرته كويسة لكن تنفيذه كان ضعيف وكان محتاج وقت أطول واهتمام أكبر.

 

علشان تبقى عارف:

الرقابة حذفت بعض مشاهد الفيلم وكان من ضمنها مشهد عن الباحث إسلام البحيري.