فكرة الرجوع في الزمن لتغيير الأحداث، اتقدمت كتير في الأفلام والمسلسلات، سواء بشكل جدي أو هزلي. ومن أشهرها فيلم (سمير وشهير وبهير).
“ساعة رضا” بيحكي عن رضا “أحمد فتحي”، اللي بيكتشف منبه قديم فيه تعويذة سحرية، قادرة ترجعه للماضي. ولما بيستخدمها بيقع في عدد من المواقف الكوميدية، اللي مابتنتهيش.
صحيح الفكرة مش جديدة، لكن الفيلم قدر يتناولها بشكل مختلف تمامًا عن الأفلام التانية. ومقبول عند قطاع كبير من الجمهور. حتى لو مش أفضل حاجة.
أحمد فتحي بيقدم أداء جيد في دور البطولة. وفتحي من الفنانين القادرين على تقديم كوميديا خاصة بهم. ومع الوقت هيقدر يطور إيفيهات خاصة به. بيشارك أحمد فتحي في البطولة: هالة فاخر، دينا فؤاد، شيماء سيف، محمد ثروت.
“ساعة رضا” مش أحسن فيلم كوميدي شوفناه. لكن في نفس الوقت ينفع كتجربة مشاهدة، للناس اللي عاوزة تقضي ساعتين في الضحك والهلس.