The Definitive Guide to Living in the Capital , Cairo , Egypt

مطاعم البرجر مافيش أكتر منها، وخصوصًا إن موضة البرجر انتشرت في القاهرة بشكل رهيب خلال الكام سنة اللي فاتوا. الفكرة إن كل مطعم فيهم لازم يعمل حاجة تشد الناس وتخليهم يرجعوا مرة ثانية وثالثة، وهو ده اللي “سلايدرز-Sliders” محتاج يوصل له.

ممكن تقول إن سلايدرز مطعم تيك أواي فيه مطبخ مكشوف وثلاثة دكك وممكن يضيفوا قعدات تانية. المطعم موجود في واحد من شوارع المعادي الجانبية جنب محل هدايا لطيف اسمه Teepee.

بعد ما قعدنا على واحدة من الدكك طلبنا كل حاجة تقريبًا في المنيو وأولهم دوبل برجر بالجبنة (42 جنيه) وواحد Wicked Double Burger ثمنه (46 جنيه) ومعاهم بطاطس (8 جنيه).

الأكل نزل على صينية خشب، والبرجر كان ملفوف بورق والبطاطس في كأس. تتبيلة البطاطس كانت لذيذة ومقرمشة وعليها شوية توابل عملت طعم مميز. أما البرجر فكان طازة وبيتي بس مافيش فيه حاجة مميزة، يعني الدوبل برجر كان عليه جبنة وخس وطماطم وصوص، أما الويكد برجر فكان نفس الكلام بس عليه بصل مكرمل، والأثنين بصراحة محتاجين صوص أكتر.

بعد حوالي عشر دقائق وصل Regular Crispy chicken ثمنه (32 جنيه) ومعاه Buffalo Crispy Chicken ثمنه (25 جنيه)، ومعاهم بطاطس بالجبنة (14 جنيه) وماك أند تشيز (18 جنيه).

الماك أند تشيز كانت عبارة عن كرات مكرونة مقلية، بس المشكلة إنهم مستخدمين بيض كتير وده واضح في طعم الأكل، وكمان الكرات محتاجة جبنة أكتر. أما البطاطس بالجبنة فكانت تحفة، وعليها بهارات وتوابل رهيبة، والجبنة السايحة طبعًا عملت شغل عالي.

أما الفراخ الكريسبي العادية والفراخ بصوص البافالو فتقريبًا مافيش فرق بينهم إلا صوص البافالو المشطشط شوية. المشكلة إن الفراخ في الحالتين كانت مزيتة جدًا والطبقة المقلية شربت الزيت.

أخر طبقين معانا هم BBQ Pulled Beef Sandwich ثمنه (25 جنيه) وهوت دوج (18 جنيه). عصارة اللحمة كلها في الساندويتش الأولاني دخلت للأسف على العيش اللي ماقدرش يمسك نفسه. الساندويتش بغض النظر عن موضوع العيش كان واضح فيه طعم الباربيكيو اللذيذ وكمان إضافة البطاطس في الساندويتش كانت هايلة. أما الهوت دوج فكان متغطي بجبنة سايحة وعليه كول سلو مسكرة، ونقدر نقول إنه أحلى ساندويتش جربناه يومها وخصوصًا إنك مع كل قطمة بتستمع بنكهة مسكرة وحادقة في نفس الوقت.

أخيرًا وصلنا للحلو، والحلو كان فرينش توست بشوكولاتة جالاكسي وكيندر (18 جنيه للواحدة). الأثنين كانوا عبارة عن قطعتين فرينش توست معمولين ساندويتش محشيين شوكولاتة وعليه سكر بودرة من فوق. التوست كان مقرمش من بره وطري من جوه، وطعمه كان حلو مع الشوكولاتة السايحة اللذيذة.

في الأخر نقدر نقول إن سلايدرز وقع في غلطات تخليه مجرد مطعم برجر والسلام. سلايدرز محتاج يعمل حاجة مختلفة عن باقي مطاعم البرجر والساندويتشات علشان الناس تفضل فاكراه، خصوصًا إن كل يوم بينزل على الساحة مطعم جديد.