The Definitive Guide to Living in the Capital , Cairo , Egypt

أفلام
شيخ جاكسون

شيخ جاكسون: عن مراهقتنا الجميلة رغم كل شيء!

  • أحمد الفيشاويأحمد مالك...
  • دراما
  • عمرو سلامة
  • في1 Cinema
تم التقييم بواسطة
Mohamed Hamdy
قيم
قيم الآن
شيخ جاكسون: عن مراهقتنا الجميلة رغم كل شيء!

في يونيو 2009 تم الإعلان عن وفاة المطرب الأشهر في العالم (مايكل جاكسون)، وفي رأينا هو ده كان التاريخ اللي بدأ عمرو سلامة التفكير فيه في تقديم فيلمه (شيخ جاكسون)، اللي بيعبر فيه أول ما بيعبر عن جيل كامل يعتبر عمرو سلامة وأحمد الفيشاوي من الناس اللي عاشوا أحداثه بنفسهم.

 

 

القصة

الفيلم بيحكي عن يوم وفاة مطرب البوب العالمي مايكل جاكسون، واللي بيعيد في ذهنه سلسلة من الأحداث بتتزامن مع فترة المراهقة الطايشة اللي مر بيها، وحبه لشخصية مايكل جاكسون وحبه لتقليده في كل تصرفاته.

الفيلم بعد كده بيستعرض إزاي اتغيرت شخصية بطلنا علشان يتجه للالتزام الديني وإيه اللي تسبب في انتقاله من النقيض للنقيض؟

فريق العمل

الفيلم من تأليف وإخراج عمرو سلامة، ومن بطولة أحمد الفيشاوي وأحمد مالك وماجد الكدواني وأمينة خليل وبسمة والطفل عمر أيمن.

 

 

الأداء التمثيلي

في البداية لازم نشيد بالأداء التمثيلي للطفل عمر أيمن واللي قدم دور مهم ومؤثر على الرغم من قلة المشاهد اللي قام بيها، أما بالنسبة لأبطال الفيلم أحمد الفيشاوي وأحمد مالك، الأثنين قدروا يجسدوا أدوارهم بشكل أكثر من رائع، وبنعتقد أنهم في تجسيدهم للشخصيات الخاصة بيهم كانوا بيجسدوا جزء من حياتهم الشخصية. الحالة دي من (الشخصنة) في التجسيد كانت مُفيدة جدًا علشان يشعر كل بطل منهم بالتوحد مع دوره وده كان ظاهر على الشاشة جدًا.

الأداء التمثيلي لأمينة خليل كان رائع، لكن مساحة دورها كانت صغيرة وكنا محتاجين نشوفها لوقت أطول على الشاشة. وبشكل عام أمينة من الممثلات اللي داخلين بقوة على مستويات عالية من الأداء والقوة والصدق في الأداء.

 

 

السيناريو والحوار والإخراج

من الأمور المميزة في الفيلم هي أن عمرو سلامة هو المخرج والمؤلف، وده جعلنا بنشعر بوحدة بين أدوات الفيلم ورموزه الموجودة بكثرة في كتير من المشاهد. أما حوار الفيلم فكان قوي ومعبر عن سيناريو الأحداث اللي حسينا أنها ماشية في ترتيبها الصحيح بدون إسراع أو بدون بطء من اللي ممكن يضايق المشاهدين. وفي النهاية برافو عمرو سلامة على فيلمه المميز.

 

 

الديكورات والموسيقى والأزياء

ديكورات الفيلم كانت جيدة، وقدرت تكون مع الإضاءة مشاهد قوية ومتميزة حملت كلها توقيع عمرو سلامة المميز واللي بنلاحظه في أفلامه.  أما الموسيقى التصويرية

واللي توقعنا أننا نسمع من خلالها مجموعة من أحلى أغاني مايكل جاكسون لكن للأسف اللي سمعناه في الأخر كان إما بعض المقطوعات المقلدة أو موسيقى كانت في رأينا ضعيفة وغير مؤثرة. والسبب إنهم ما قدروش يستخدموا موسيقى مايكل جاكسون بسبب حقوق الملكية الفكرية.

وأخيرًا فالأزياء الخاصة بالفيلم كانت مميزة واستوحت ملابس مايكل جاكسون في كتير من خطوطها وجنونها واللي فكرتنا بمراهقتنا اللي كانت رغم كل مشاكلها وقلة التكنولوجيا فيها كانت جميلة ومميزة وليها طعم خاص حسيناه مع (شيخ جاكسون).

 

 

الخلاصة

بنتمني كل التوفيق لفيلم شيخ جاكسون في مسابقة الأوسكار، وبننصح بمشاهدة الفيلم لكل محبي مايكل جاكسون، خصوصًا اللي حضروه في فترة مراهقتهم.

علشان تبقى عارف:

الفيلم يعتبر التعاون الثاني بين عمرو سلامة وأحمد الفيشاوي بعد فيلم (زي النهارده).

عجبك ؟ جرب

فيلم لا مؤاخذة

نصيحة 360

تم اختيار الفيلم لتمثيل مصر في مسابقة الأوسكار العالمية على فئة أفضل فيلم أجنبي.

Mostafa Hamed

فيلم جميل جدا وفكرني بأيام زمان. أنا كنت من عشاق مايكل جاكسون.. قول للزمان ارجع يازمان

أكتب تقييم

One thought on “شيخ جاكسون: عن مراهقتنا الجميلة رغم كل شيء!

  1. فيلم جميل جدا وفكرني بأيام زمان. أنا كنت من عشاق مايكل جاكسون.. قول للزمان ارجع يازمان

أضف تعليقاً

يجب أنت تكون مسجل الدخول لتضيف تعليقاً.

مقترح