The Definitive Guide to Living in the Capital , Cairo , Egypt

الصور: Film Clinic

لو سألتنا عن رأينا في واحدة من أصعب المهارات في الحياة، هي مهارة إدارة علاقاتنا. مش بس علاقتنا بشريك الحياة، لكن علاقتنا بأهلنا وأصحابنا، والناس المهمين في حياتنا بشكل عام.

هي دي المشكلة الأساسية اللي بتواجه ناجي، بطل فيلم (فرق خبرة)، اللى استمتعنا بمشاهدته حصريًا على منصة شاهد بلس، بعد رفعة من السينمات مباشرة.

من المشهد الأول للأحداث بنشوف أن ناجي (قام بالدور محمد الشرنوبي) قادم من عائلة بتعاني من المشاكل والتفكك، حياته روتينية، بالتالي بيفشل في التعرف على إنسانة يحبها، لكن من ناحية تانية، صاحبه الأنتيم (قام بدوره طه دسوقي) بيحاول يخلي ناجي يعيش حياته بشكل أفضل، ومن هنا بيتعرف على صديقته (قامت بالدور هدى المفتي) اللي بتتطور العلاقة بينهم لعلاقة حب.

شريف نجيب مؤلف ومخرج الفيلم (أول إخراج لشريف) نجح أنه يدخلنا في حياة ناجي بشكل كويس، ومباشرة من المشهد الأول، لكن كنا محتاجين نشوف جوانب مختلفة من حياته علشان نكون أكتر تعاطفًا معاه. استعراض حياة ناجي في الشغل أو حياته الأسرية، كان أقل من استعراض حياته العاطفية، رغم أن مثلا المساحة الأسرية في حياة ناجي اللي قدم فيها محمود البزاوي ودلال عبد العزيز -الله يرحمها- أدوارهم فيها بشكل أكتر من رائع، كانت محتاجة يتم التعرض لها بشكل أحسن من كده، وعدم استخدامها كمجرد خيط كوميدي أحيانًا في الخلفية.

ورغم إننا مبنعتبرش محمد الشرنوبي ممثل قوي، لكن لو هنتخيل شخصية ناجي لما كتبها شريف على الورق، صعب نشوف حد يمثل الشخصية دي أفضل من الشرنوبي. هدى المفتي كمان كانت اختيار أكتر من رائع بملامحها المصرية الخالصة وقدرتها التمثيلية الجيدة. بحيث قدرت توصل لنا مشاعر الشخصية من غير مانحس أنها بتمثل أو بتبذل مجهود.

مش هانحاسب طه دسوقي على اختياراته السينمائية دلوقت علشان هو في مرحلة الانتشار، لكن كنا نتمنى نشوفه في نوعية أدوار مختلفة عن أنه يكون الخيط الكوميدي في الأحداث، أو مجرد الشاب المهووس بفكرة ما. لكنه قدم دور مقبول، ونتوقع له هيكون مستقبل كويس لو فكر يغير نوعية أدواره، لما يكون في إيده اختيار أدواره.

مش هنقدر نخوض كتير في تفاصيل نهاية (فرق خبرة) علشان حرق الأحداث، لكن النهاية عجبتنا جدًا، لأنها كانت صادمة وواقعية بنسبة كبيرة. هل حسينا أن (شريف نجيب) استسهل في تداعيات الأحداث اللي وصلتنا للنهاية؟ بالفعل حسينا ده عند مرحلة ما في الأحداث. لكن في النهاية مانقدرش نعتبر (فرق خبرة) فيلم فاشل.

فرق خبرة باختصار، هو عمل جميل و(رايق). ومناسب للمشاهدة بدون توقعات مسبقة كبيرة. يمكن مش بيعرفنا إزاي ندير علاقاتنا بالأخرين، لكن على الأقل ممكن يحمسنا نغير روتين حياتنا الممل، ونجرب حاجات جديدة.