The Definitive Guide to Living in the Capital , Cairo , Egypt

بعض الأفلام بنتفرج عليها مع بعض التخوفات بخصوص قصتها والسيناريو الخاص بها. والحقيقة أن طلق صناعي كان واحد من الأفلام دي، لكن الخلطة السينمائية اللي تمت صناعته بيها خليتنا نثق في صناعه ونشعر إننا أمام فيلم خفيف وقوي ومؤثر في نفس الوقت. تعالوا نشوف مع بعض ليه بنقول لكم كده.

القصة

طلق صناعي بيحكي عن ماجد الكدواني وزوجته حورية فرغلي، واللي بيخططوا لدخول السفارة الأمريكية وتسهيل ولادة الزوجة داخل السفارة علشان يحصل الأولاد على الجنسية الأمريكية. لكن مع تطور الأحداث بيضطر الزوج لأخذ كل اللي في السفارة رهائن لحين تحقيق هدفه!

فريق العمل

الفيلم من تأليف محمد وخالد وشيرين دياب ومن إخراج خالد دياب وبطولة ماجد الكدواني وحورية فرغلي ومصطفى خاطر وسيد رجب وبيومي فؤاد وأكرم الشرقاوي، مع مشاركة عدد كبير من الفنانين والنجوم.

الأداء التمثيلي

أصبح من المعتاد إننا نقول أن الأداء التمثيلي لماجد الكدواني كان أكثر من رائع، والحقيقة إن الكدواني قادر يتشكل علشان يقدم لنا شخصيات لم نكن نتوقع أنه قادر على تقديمها، والمرة دي الكدواني بيلعب في منطقة الكوميديا السوداء بقوة وتألق.

حورية فرغلي وعلى الرغم من الفرصة القوية اللي كانت أمامها علشان تقدم دور قوي لكن ملامحها كانت جامدة وكانت مش قادرة تقدم لنا أكثر من انطباع أو اثنين فقط على وجهها، وحسينا إن كان ممكن يطلع منها أداء تمثيلي أفضل من كده.

سيد رجب كان واحد من أهم أعمدة الفيلم فيما يتعلق بالكوميديا، وكان كل مشهد له بيقدم لنا جرعة ممتازة من الضحك، واللي جعلتنا نتذكر دوره حتى بعد خروجنا من قاعة العرض. كمان بيومي فؤاد قدر يقدم دور متميز وكوميدي.

السيناريو والحوار والإخراج

سيناريو الفيلم ممكن نقسمه الى قسمين. القسم الأول بيمتد حتى الربع الأخير من الأحداث، وده كان مميز وقوي ومترابط، والقسم الثاني من لحظة دخول الفيلم في مرحلة تقفيل الأحداث والأستعداد للختام، ودي مرحلة السيناريو فيها كان مستعجل جدًا وحسينا أنه بيحاول (يلوي دراع) الأحداث علشان تستجيب للنهاية الموضوعة في السيناريو! وللأسف دي نقطة مش هنقدر نوضحها أكتر من كده علشان مانحرقش أحداث الفيلم، ودي برضه كانت مسئولية الإخراج  وهي النقطة السلبية الوحيدة اللي ضايقتنا أثناء مشاهدة الفيلم.

الديكورات والموسيقى والأزياء

ديكورات الفيلم كانت مميزة خاصة ديكورات السفارة الأمريكية اللي بيتم تصوير معظم الأحداث فيها، لكن الموسيقى كانت أضعف من أننا نتذكرها بعد نهاية الأحداث أو تسيب أثر في ذاكرتنا.

الخلاصة

طلق صناعي فيلم كوميدي مع تلميحات سياسية قوية، وننصح بمشاهدته لأنه مش بس فيلم خفيف، لكنه بيحمل رسالة وهدف يستحقوا التشجيع والاهتمام.

علشان تبقى عارف:

الفيلم نجح ينافس ويحقق إيرادات كبيرة.