The Definitive Guide to Living in the Capital , Cairo , Egypt

على مدار تاريخ قسم الأفلام في “كايرو360” نقدر نقول إن عدد الأفلام اللي حصلت على تقييم 5 نجوم كان قليل جدًا، وللعلم القرار ده بيكون صعب لكن الغريب في 1917 إنه خد التقييم كامل بدون تفكير! ولو كان عندنا نجمة سادسة كان هياخدها بمنتهى السهولة.

فيلم 1917 بيحكي عن قصة بسيطة لجنديين بريطانيين بيتم تكليفهم بمهمة توصيل رسالة لمجموعة من الجنود البريطانيين المحاصرين خلف خطوط العدو، ونجاح المهمة دي هيكون سبب في إنقاذ 1600 جندي من الموت المحقق، لكن المهمة مش سهلة إطلاقًا، وفيها مخاطر كتير.

زي ما قولنا القصة بسيطة جدًا ومافيهاش أي تعقيد، لكن الرحلة الخطيرة اللي أخدنا فيها المخرج العبقري “سام ميندز” -وهو بالمناسبة مخرج فيلم Skyfall وحاصل على جائزة أفضل مخرج عن الفيلم في حفل Golden Globes- رحلة غير تقليدية، وكل عوامل العبقرية كانت فيها، وبميزانية وصلت لـ 100 مليون دولار أمريكي.

بداية من التصوير الرائع اللي اعتمد على فكرة اللقطة الواحدة “One shot” وده أسلوب في التصوير بيخلي المشاهد يحس إنه دخل الأحداث مع الممثلين وإنه مش مجرد متفرج، على الرغم من إننا مش بنشوف الخلفية اللي بييجي منها الجنديين أبطال الفيلم، لكن بنحس بالتوحد معاهم والرغبة إننا نكون مكانهم في بعض المشاهد.

التصوير لايمكن ينجح بدون اختيار البيئة المناسبة، والفيلم قدم لنا أكثر من بيئة مختلفة بتدور فيها الأحداث، مع كادرات وحركة كاميرا أكثر من رائعة، كل ده بدون (فذلكة) على المشاهدين.

لا يمكن ننسى الموسيقى التصويرية المعبرة جدًا، اللي تحسوا إنها عارفه إمتى تبقى عالية ومسيطرة على المشهد، وإمتى تقل وإمتى تسكت خالص علشان تخلينا نستمتع بالأحداث، ناقص حاجة ماقولناش عليها عبقرية؟ أيوة.. الأداء التمثيلي.

الأداء التمثيلي لأبطال الفيلم “دين تشارليز تشابمان” و”جورج ماكاي” كان أكتر من مبهر، أداء مميز هادي بيعلى مع الأحداث واحدة واحدة بدون عصبية أو افتعال، وقربنا من الحالة النفسية والإنسانية للجنود في الحرب العالمية وفي أي حرب عمومًا.

ودي لقطات أثناء التصوير الفيلم: