The Definitive Guide to Living in the Capital , Cairo , Egypt

لو كان تم تسويق فيلم After Midnight كفيلم درامي تقليدي فيه شوية مشاهد أكشن على بعض التشويق، كان هيحقق نجاح أفضل من تسويقه كفيلم رعب، لإنه بصراحة أبعد ما يكون عن الرعب.

فيلم After Midnight بيحكي عن “هانك” اللي عايش في بيت غريب شوية، وفي يوم بيكتشف غياب حبيبته عن البيت، وفي نفس الوقت هيلاقي علامات وخدوش لحيوان غريب على الباب، ومن هنا بتتطور الأحداث.

لما بنكتب ملخص القصة على الورق بنشوف عوامل أساسية ممكن يطلع منها فيلم رعب حلو، لكن تنفيذ القصة دي على الشاشة كان ضعيف، وخاصةً في الإنتاج، اللي كان واضح إنه عاوز يقدم فيلم تكلفته قليلة، فقدم في النهاية فيلم فاضي، عبارة عن شوية لقطات قليلة جدًا للحيوان المتوحش، مع استرسال طويل في الحوارات بين الأبطال.

بس للإنصاف لازم نقول إن الأداء التمثيلي للأبطال “جيريمي جاردنر” و”بريا جرانت” كان جيد، وحوار الفيلم كان مكتوب بإتقان عالي، وبالمناسبة “جيريمي جاردنر” هو مؤلف ومخرج الفيلم بالإضافة لقيامه ببطولته.

الديكورات في الفيلم كانت ممتازة، والجمع بين ديكورات المناطق المفتوحة في التصوير وديكورات البيت كان رائع، لكن كنا محتاجين نشوف لقطات بعدسات أوسع أو تصوير من الـ(درونز) اللي بتصور مشاهد من أعلى بزوايا كبيرة.

الاهتمام بالمؤثرات الخاصة كمان كان هيفرق كتير في الفيلم.