The Definitive Guide to Living in the Capital , Cairo , Egypt

على الرغم من تقدمه في العمر، إلا أن مجرد أن أي فيلم يحمل اسم الفنان توم كروز، ده بيعتبر شهادة على نجاح الفيلم وتميزه. كروز وإن كان مش أفضل ممثل في العالم، لكنه واحد من الفنانين القليلين اللي بيحترموا عملهم وبيبذلوا قصارى جهدهم علشان يخرج بأفضل شكل ممكن.

القصة

فيلم American Made المقتبس عن قصة حقيقية بيحكي عن عميل للسي أي إيه الأمريكية بيشتغل طيار، وبيأدي مهام للولايات المتحدة، لكنه بينحرف عن طريقه وبيتجه لتهريب المخدرات لصالح عصابات في كولومبيا. هل هيقدر ينجو بأعماله؟ هو ده السؤال اللي بيطرحه الفيلم.

فريق العمل

الفيلم من بطولة توم كروز ودومنال جليسون وجيسي بليمونس ولولا كيرك وسارة رايت ومن إخراج دوج ليمان وتأليف جاري سبينيللي.

الأداء التمثيلي

توم كروز كالعادة بيبهرنا بأداء تمثيلي متميز واهتمام كبير بالدور اللي بيقوم بيه، لكن الأدوار المساعدة في الفيلم للأسف ماكانتش بنفس القوة اللي كنا نتوقعها أو اللي تتناسب للتمثيل مع كروز، ونخص هنا سارة رايت اللي قامت بدور لوسي على سبيل المثال، بالإضافة لباقي الأدوار في الفيلم.

السيناريو والحوار والإخراج

سيناريو الفيلم اعتمد على فكرة التشويق من أول مشهد للنهاية، وقدر ياخدنا بعيد عن الملل ويقنعنا بمشاهدة الفيلم حتى النهاية، وكان فيه جزء كوميدي في الفيلم لا يستهان به وده اعتمد بشكل كبير على الحوار وعلى ردود أفعال توم كروز في بعض المشاهد، وده فكرنا بالفيلم العبقري the wolf of wall street واللي جمع بين التشويق والكوميديا والحركة في نفس الوقت.

أما إخراج الفيلم فقدر يجمع كل العناصر دي في الأحداث وده مجهود لا يستهان به ويحسب له.

الديكورات والموسيقى والأزياء

ديكورات الفيلم كانت مميزة وقدرت ترجعنا لفترة الثمانينيات بسهولة، كمان الموسيقى الخاصة بالفيلم والأزياء كانت متناسقة مع الأحداث والفترة الزمنية اللي بتدور فيها، وطبعًا المؤثرات الخاصة ومشاهد قيادة السيارات وغيرها من الأمور كانت كلها في أفضل حالاتها، وقدر الإخراج يطوعها لخدمة أحداث الفيلم بالمقام الأول.

الخلاصة

فيلم American Made فيلم قوي عن تجارة المخدرات وفساد الإدارة الإمريكية، ننصحكم بمشاهدة لو من هواة أفلام الحركة في إطار سياسي مع شوية كوميديا خفيفة.