The Definitive Guide to Living in the Capital , Cairo , Egypt

بعد النجاح اللي حققه فيلم Army of the Dead قرر صناعه أنهم يقدموا لنا فيلم Army of Thieves اللي بيدور في نفس العالم، لكن في فترة زمنية قبل أحداث هجوم الزومبي اللي شوفناه في Army of the Dead. والمميز أنكم مش محتاجين تشوفوا الفيلم الأول قبل مشاهدة Army of Thieves لأن قصته منفصلة بذاتها.

فيلم Army of Thieves بيحكي عن لودفيج ديتر، شاب عايش حياة مملة جدًا – قام بالدور ماتياس شواجوفر- رغم أنه فاتح خزائن عبقري. لكن هوايته الوحيدة هي الشغل على قناة يوتيوب ماحدش بيشوفها تقريبًا. لحد ما بيجيله في يوم تعليق بيقوله لو عاوز تختبر مهارتك في فتح الخزائن، تواصل معانا.

ديتر بيتواصل فعلًا مع ناس عرفنا بعد كده أنهم منظمة إجرامية بتستهدف فتح ٤ خزائن من أصعب خزائن العالم. وديتر المفترض هيتعاون معاهم في مغامرة هاتغير شكل حياته للأبد.

لو هنتكلم عن Army of Thieves كفيلم تسلية بيقدم تيمة (السطو على بنك) بطريقة مختلفة شوية، مع شوية مشاهد للزومبي علشان الربط بين أحداثه وأحداث Army of the Dead في الحالة دي هنشوف أن الفيلم كويس وقدم حوالي ساعتين من التسلية مع شوية كوميديا على خيط رومانسي بسيط.

أما لو هنقيم Army of Thieves كفيلم المفترض يقدم أكتر من مجرد وقت لطيف، هنلاقي أنه كان ممل خاصة في منتصف الأحداث، بعد ما بنعرف خلفية كل شخصية ودورها في الأحداث. الباقي كله بيكون قابل للتوقع، بالتالي ما كانش عندنا صبر نشوف حوارات طويلة بين الأبطال علشان نعرف تفاصيل أكتر عن شخصياتهم أو تفسير للمواقف اللي هياخدوها بعد كده، لأننا عارفين بالظبط مين هيعمل إيه إمتى وفين، لأن الفيلم ماشي على التيمة بتاعة تكوين الفريق وارتكاب عملية سرقة كما يقول الكتاب. بدون أي محاولة للخروج عن النص.

أكتر حاجة بتكون ممتعة في أفلام السطو، هي تقديم أفكار مبتكرة للسرقة، فاكرين مثلًا فيلم The Italian Job انتاج ٢٠٠٣ اللي قدم أفكار رائعة وتنفيذ سرقات ولا أروع، للأسف ده ماحصلش في Army of Thieves وأفكار السرقة إما كانت خيالية بزيادة، أو قابلة للتوقع بشدة.

الأداء التمثيلي للثنائي ناتلي إيمانويل جميلة مسلسل Game of Thrones والمشهورة بدورها فيه، مع ماتياس شواجوفر في دور فاتح الخزائن المحترف، دويتو أكتر من رائع وساعد على اظهاره، الفرق بين شخصية كل واحد منهم واللي ساهمت القصة والسيناريو في رسمهم بشكل جميل جدًا، واستغلاله كوميديا كويس قوي.

مشاهد فتح الخزن نفسها، وتنفيذ المشاهد بحيث نشوف ايه اللي بيحصل داخل الخزنة أثناء فتحها، كان واحد من أحلى المشاهد اللي شوفناها في الفيلم رغم تكرار المشهد أكتر من مره. كادرات الفيلم بشكل عام كانت لوحة فنية جميلة ودافية. لكن مش ده اللي بيدور عليه المشاهد في أفلام بالتيمة دي. الاهتمام الأكبر هنا بيكون بمشاهد المطاردات والأكشن، واللي كانت متوسطة مش مبهرة ومش سيئة جدًا.

فيلم Army of Thieves هو محاولة لبناء عالم سينمائي، وفي رأينا أن المحاولة دي كانت الأحسن تكون صناعة فيلم مستقل بذاته، كنا هنتقبلها بأكتر من تقبلنا للفيلم كحلقة بتحاول تستغل نجاح فيلم سابق لها.