The Definitive Guide to Living in the Capital , Cairo , Egypt

بعض الأفلام بتستغل توقيت معين أو مواسم معينة علشان تتعرض وتقدم لنا عمل يحقق نجاح مضمون، لكن وعلى الرغم من عرض Black Christmas في موسم الكريسماس لكنه ماقدرش يحقق معادلة النجاح رغم سهولتها.

وللأسف نفس الفشل ده بنشوفه في أفلام الرعب اللي بيتم عرضها في مواسم الهالوين وباقي المواسم المحفوظة اللي بيتعرض فيها أفلام بتيمات معينة.

فيلم Black Christmas بيحكي عن مجموعة بنات بيتجمعوا مع بعض، ودي بتبقى فرصة كويسة لقاتل غامض علشان يقتلهم، وبعدين مع الوقت وتسلسل الأحداث بيبدأوا يكتشفوا حقيقة الأحداث المرعبة اللي بيعيشوها، ودي هي نفس القصة اللي اتهرست في ألف فيلم قبل كده، لدرجة بتخلينا كمشاهدين عارفين كل تفصيلة في الفيلم من قبل ما تحصل، ويمكن من أول ما شوفنا تريلر الفيلم أصلاً.

لما بنشوف فيلم زي Black Christmas بنبقى عارفين إننا قدام حبكة مهروسة وشوفناها في أكتر من فيلم قبل كده، علشان كده رهاننا الأساسي بيكون على العناصر المساعدة للحبكة زي تنفيذ مشاهد الرعب والقتل والمؤثرات الخاصة والأداء التمثيلي، ولكن للأسف الفيلم فشل في كل ده، وخسرنا الرهان.

الأداء التمثيلي كان ضعيف، وتنفيذ مشاهد القتل مافيهوش أي نوع من أنواع الابتكار، وكل مشهد نقدر نعرف بدايته ونهايته ونتوقعهم، وده مش علشان احنا عباقرة، لكن علشان الفيلم فعلاً خالي من أي ابتكار.