Charlie’s Angels
فيلم Charlie’s Angels: عن “التريند” الجديد في هوليوود
Charlie's Angels إيلا بالينسكا تشارلي كرستين ستيوارت ناعومي سكوت-
إليزابيث بانكسدجيمون هونسو...
-
حركة ومغامراتكوميدي
-
إليزابيث بانكس
-
في1 Cinema
Mohamed Hamdy
من الواضح إن سيطرة المرأة، وسعيها للمساوة مع الراجل بل والتفوق عليه في بعض الأحيان بقت هي “الترند” الجديد في هوليوود، وده اللي هنلاحظه بشكل واضح في أفلام زي فيلمنا النهارده Charlie’s Angels.
فيلم Charlie’s Angels بيحكي عن مهمة جديدة لمجموعة “فتيات تشارلي” اللي طبعًا متدربين على استخدام العنف والحيل والتنكر وأعمال المخابرات، وهدفهم المرة دي حماية العالم من جهاز سري جديد، لكن المرة دي على عكس الأجزاء السابقة مافيش “تشارلي” موجود علشان يتحكم في البنات ويديهم أوامر، إحنا خلاص بقينا في عصر تمكين المرأة.
الطابع الأنثوي واضح على الفيلم، بدايةً من فريق العمل اللي كله سيدات وصولًا بظهور الرجالة الباهت في الفيلم وبيظهروا طول الوقت على إنهم أشرار ودايمًا بيخسروا قدام “ملائكة تشارلي”.
بصراحة كان نفسنا في ممثلة ثقيلة في الأداء التمثيلي علشان تشيل مسئولية البطولة في الفيلم، مع كامل احترامنا لـ”كرستين ستيوارت” و”إيلا بالينسكا” و”ناعومي سكوت” لكن الفيلم كان محتاج بطلة من العيار الثقيل وعندها الخبرة التمثيلية والشهرة اللي تحقق بيهم بعض التوازن في الفيلم.
من الحاجات اللي كانت ضعيفة في الفيلم “الحوار” بين البطلات، واللي كان غير منطقي وفيه جُمل كتير محطوطة بس علشان تُستعمل في التريلر أو تضحك بدون أي تفكير في مدى منطقيتها، ودي من الحاجات اللي ضايقتنا.
لكن وبشكل موضوعي الفيلم مش كله سلبي، يعني مثلًا نقدر نقول إن مستوى الكوميديا في الفيلم جيد، وإخراج مشاهد الأكشن كان مُلفت للنظر ومسلي، والفيلم بشكل عام خفيف ومفهوم ومافيش فيه أي شعور بالملل.