The Definitive Guide to Living in the Capital , Cairo , Egypt

واضح أن هوليود قررت تعيد استغلال كل الأفلام اللي بتحقق نجاح  تجاري علشان يتم تقديم أجزاء جديدة منها، في محاولة من منتجيها لتحقيق مزيد من النجاح.

من فترة شوفنا فيلم Escape Plan بطولة سيلفستر ستالون وأرنولد شوارزنيجر. في تعاون فكرنا بكلاسيكيات السينما التجارية الناجحة. زي فيلم tango and cash اللي كان من بطولة سيلفستر برضه.

في Escape Plan 2 بنشوف مهمة جديدة لراي برسلين خبير الهروب من السجون وتأمينها. واللي بيكون فريق من المتخصصين علشان يساعدوه. لكن اعتقال واحد من الفريق بيقلب الموازين، وبتبدأ معاه سلسلة جديدة من عمليات الهروب من السجون.

على الرغم من تقدم سيلفستر ستالون في العمر إلا أنه لسه قادر على أداء أفلام الأكشن ببراعة مميزة. كمان على مستوى الأداء التمثيلي، ستالون قادر يدينا انطباعات إنسانية جيدة جدًا. على الرغم من أن سيناريو الفيلم وقصته اللي كتبها مايلز تشابمان، مش بتدي كتير من الوقت أو الفرص لإظهار العواطف والمشاعر الإنسانية.

إخراج ستيفن سي ميلر للفيلم كان جيد، وزود الوقت والمجهود لإخراج مشاهد الأكشن. والحقيقة أن مجهوداته جت بنتيجة كويسة، لأن محبي الأكشن هيلاقوا في الفيلم اللي بيحبوه. من خلال مجموعة كبيرة من مشاهد الالتحام والمطاردات.

على الرغم من قوة الموسيقى التصويرية إلا إنها كانت أضعف عوامل الفيلم من وجهة نظرنا. أما ديكور السجن والمجهود اللي تم بذله علشان يخرج بصورته النهائية، فمجهود يستحق الثناء وكانت نتيجته النهائية قوية ومميزة.

Escape Plan 2 فيلم لعشاق أفلام الهروب من السجون. محبي النوستالجيا الخاصة بأبطال أفلام أكشن التسعينات، نرشح لهم الفيلم بقوة للمشاهدة.

علشان تبقى عارف: تم تصوير الفيلم في حوالي 20 يوم فقط.