The Definitive Guide to Living in the Capital , Cairo , Egypt

بعض الأفلام الكوميدية بتعتمد على فكرة المواقف المضحكة اللي بتحصل في رحلة طويلة بيقوم بيها أبطال الفيلم، يعني الرحلة نفسها بتكون هي مصدر الكوميديا، تعالوا نتعرف أكتر على فيلم Father Figures.

القصة

الفيلم بيحكي عن توأم غير متشابه بيعرفوا من أمهم أنها كانت بتكذب عليهم بخصوص وفاة والدهم وأنه في الحقيقة لسه عايش، ومن هنا بيبدأوا في رحلة طويلة لتتبع خطوات والدهم والتعرف عليه، ومن هنا بتظهر مجموعة من المشاهد الكوميدية اللي مش بتنتهي وبتتفجر مع كل موقف.

فريق العمل

الفيلم من إخراج  لورانس شير، ومن تأليف جاستن مالين، ومن بطولة  كريستوفر والكن وأوين ويلسون وجلين كلوز وجي كيه سيمونز وإيد هيلمز وفينج راميز.

الأداء التمثيلي

الأداء التمثيلي للأبطال كان كوميدي وجميل ومميز وماحسناش إننا زهقانين منه، لكن كان من الأفضل لو كان الأداء ده مقرون بتقليل جرعة النكت والإيحاءات الجنسية علشان الفيلم يكون مناسب لكل أفراد الأسرة.

السيناريو والحوار والإخراج

سيناريو الفيلم كان بعيد عن الملل وقدر يحرك وتيرة الأحداث بسرعة ودقة، كمان الحوار كان عليه جانب وعبء كبير جدًا فيما يتعلق بالكوميديا، وقدر الحوار أنه يقوم بمسؤوليته ويحقق المطلوب منه على الصعيد الكوميدي، وطبعًا إخراج الفيلم قدر يلعب بكل العناصر دي علشان يقدم لنا في النهاية كوميديا قوية وجيدة.

الديكورات والموسيقى والأزياء

في النوعية دي من الأفلام الكوميدية مش بيكون تركيز صناعها الأول على الديكور والموسيقى، وده اللي شوفناه فعلًا في الفيلم، وكنا نتمنى لو تم الأهتمام بالديكور والموسيقى التصويرية أكتر من كده، ودي من العيوب اللي بناخدها على الفيلم.

الخلاصة

فيلم Father Figures فيلم كوميدي جيد لكنه غير مناسب لكل أفراد الأسرة

علشان تبقى عارف:

تقييم الفيلم على موقع IMDB وصل لـ 5 من 10.