The Definitive Guide to Living in the Capital , Cairo , Egypt

من فترة طويلة نسبيًا أصيبت المنطقة العربية – ومصر من ضمنها – بحمى المصارعة. الشباب والكبار كانوا مهووسين بعروض مصارعة المحترفين، ولمعت أسماء المعلقين الرياضيين زي ممدوح فرج – الله يرحمه – وغيرهم.

فيلم Fighting with My Family بيستمد قوته من خلال قصة حقيقية عن المصارعة (بيج) وحياتها في عالم المصارعة الحرة وصعودها هي وأسرتها لعالم الترفيه القتالي في أمريكا. لكن قوة الفيلم الحقيقية في طوفان الكوميديا المصاحبة لقصة الصعود. الكوميديا الصارخة اللي بتخلينا أحيانا نقع على الأرض من فرط الضحك.

الجميل في الفيلم أنه مش موجه فقط لمحبي المصارعة، لكن موجه لأي شخص بيحب أفلام الكوميديا المعتمدة على خلفية رياضية وهنا يبرز دور المخرج والمؤلف ستيفن ميرشانت واللي قدر يصنع فيلم ولاءه الأول والأخير الترفيه عن المشاهدين بدون أي اعتبارات تانية. أو بمعنى أصح بدون إقحام رسالة أخلاقية معينة. ودي من عناصر قوة الفيلم.

الأداء التمثيلي لكل أبطال الفيلم كان مميز. زي جاك لودين و لينا هيدي وطبعًا دواين جونسون (ذا روك) واللي بيظهر بشخصيته الحقيقية في أحداث الفيلم.

لو كنتم من محبي أفلام المصارعة فيلم Fighting with My Family هيكون مميز جدًا بالنسبة لكم. أما لو كنتم من محبي الكوميديا فقط الفيلم بيقدم جرعة كوميدية جميلة جدًا وتستحق المشاهدة.

علشان تبقى عارف: تقييم الفيلم على موقع IMDb هو 7.6 من 10.