The Definitive Guide to Living in the Capital , Cairo , Egypt

معظم الأفلام بشكل عام بتحاول تقدم أكثر من قيمة وهدف وتيمة من خلال أحداثها، لكن معظم الأفلام اللي بتحاول تعمل كده بتفشل فشل ذريع، لكن ولحسن حظنا Ford v Ferrari كان من الأفلام اللي نجحت مش بس في إنها تقدم فيلم سباق سيارات كله أكشن، لكن كمان فيلم إنساني رفيع المستوى.

فيلم Ford v Ferrari بيحكي عن المنافسة اللي دخلت فيها شركة فورد مع شركة فيراري اللي كانت في وقتها متربعة على عرش عالم سيارات السباق، لكن الجميل في الفيلم إننا بنشوف الصراع بين الشركتين مش بس في حلبة السباق، لأ ده كمان على أكتر من مستوى، سواء على المستوى الإنساني أو المستوى العملي في جو كله حماس وقصة مقتبسة عن أحداث حقيقية دارت سنة 1966 ضمن أحداث سباق “لومان” الشهير.

المخرج العبقري “جيمس مانجولد” قدر ياخدنا في رحلة غير تقليدية في عالم سباق السيارات، وده لإنها مش مجرد رحلة بتبروز منافسة بين شركتين، لكن كمان رحلة نفسية في عقل وقلب أبطال الفيلم “كريستان بيل” و”مات ديمون”.

ولما بنقول “كريستان بيل” و”مات ديمون” فاحنا بنتكلم عن اتنين من عمالقة هوليود، قدروا يخلقوا حالة من الكيمياء بينهم تخلي المشاهدين منتظرين كل مشهد لأي واحد فيهم علشان نتفرج على مباراة مميزة من الأداء الراقي.

كل ده كان معمول وسط تصميم مشاهد أكثر من رائع، وهندسة صوت مهتمة بكل تفصيلة من تفاصيل الفيلم، أما عن تصميم مشاهد السباقات نفسها فكانت أكثر من رائعة وفيها مجهود مميز واهتمام غير عادي بالتفاصيل وزوايا الكاميرا وطرق إخراج المشاهد.