The Definitive Guide to Living in the Capital , Cairo , Egypt

من الحكم المشهورة في التراث الإنساني إن الكنز الحقيقي في حياة الإنسان هي الخبرات والتجارب اللي بيقابلها في حياته، وفي سعيه للوصول لهدفه، وهو ده الهدف الأساسي من فيلم Frozen II.

فيلم Frozen II من الأفلام القليلة اللي الجزء الثاني منها لا يقل جمال عن الجزء الأول، لأ ده احنا لاحظنا كمان إن فيه تقدم في مستوى الإخراج والمستوى التقني، ده غير إن الأحداث كمان كانت وتيرتها أعلى وأفضل، ومن الواضح إن المخرجين “كريس باك” و”جينيفر لي” كان اهتمامهم الأساسي إنهم يقدموا صورة مبهرة وألوان جميلة وخلابة.

الفيلم بيحكي عن رحلة أبطال الفيلم (آنا) و(إلسا) و(كريستوف) و(أولاف) في الغابة لاستكشاف سر قديم عن مملكتهم، ومع سير الأحداث بنكتشف إن المتعة والمغامرة في الرحلة نفسها مش في السر اللي هيكتشفوه.

لو ماشوفتوش الجزء الأول من السلسلة تقدروا تتابعوا الجزء الثاني بسهولة نتيجة مشاهد الفلاش باك اللي في بداية الأحداث، وبعدها بنبدأ رحلة الجزء الثاني اللي زي ما قولنا تميزت بالرسومات اللي كلها حياة وألوان ممتعة للكبار والصغار على حد سواء.

من ناحية تانية مستوى الأغاني في الجزء الثاني كان أقل من مستوى الأغاني في الجزء الأول، وحسينا إن الفيلم كان محتاج يهتم بالجزئية دي بقدر اهتمامه بالأداء الصوتي المميز جدًا من أبطال الفيلم، وعلى الرغم من إن المسؤولين عن موسيقى الفيلم هما “روبيرت لوبيز”و”كريستن آندرسون لوبيز” وهما من الفائزين بالأوسكار في المجال ده.

الأداء الصوتي للأبطال “كريستين بيل” و”إدينا منتزل” و”ستيرلنج كي براون” كان أكثر من رائع، وحسسنا إننا أمام شخصيات حقيقية من لحم ودم مش مجرد شخصيات كارتونية.