The Definitive Guide to Living in the Capital , Cairo , Egypt

أفلام كتيرة بتحاول تخلط بين الأكشن والكوميديا والإثارة، لكن أفلام كتير برضه بتفشل في تحقيق الهدف ده، لكن فيلم Gringo في رأينا نجح في صنع مزيج مجنون من الدراما والأكشن والكوميديا في فيلم واحد.. تعالوا نتعرف أكتر على تفاصيله.

القصة

من الصعب نحكي قصة فيلم Gringo بدون حرق الأحداث، لكن ممكن نقول أن رجل أعمال أمريكي بيستعد لإطلاق منتج جديد للأسواق لكن حياته بتنقلب رأسًا على عقب وبيدخل في سلسلة من الأحداث المجنونة وغير المتوقعة. ياترى إيه اللي هيحصل له بالظبط؟

فريق العمل

الفيلم من إخراج ناش إجيرتون، ومن تأليف ماثيو ستون، ومن بطولة تشارليز ثيرون وأماندا سيفريد جويل إجيرتون وثاندي نيوتن وهاري تريدواي.

الأداء التمثيلي

تشارلز ثيرون من الواضح إنها دخلت في مرحلة قوية ومتقنة من أدائها الفني، لأن اختياراتها الفنية الأخيرة بتدل على روح تمثيلية قتالية وقدرة عالية على تقمص أي دور تقرر القيام به، وده من النادر إننا نلاقيه في كتير من ممثلي هوليوود في الفترة الأخيرة واللي بنلاحظ فيها كتير من التراجع في مستوى الأداء الفني على حساب الإبهار البصري.

السيناريو والحوار والإخراج

سيناريو الفيلم قوي وسريع ومتلاحق ومش بيسيب لحظة للمشاهدين للشرود أو التفكير في أي شيء أخر غير الأحداث اللي بتدور بسرعة  كبيرة، كمان عجبنا اهتمام المخرج بالكاميرا والتصوير والتنقل السريع بين الكادرات والأسلوب الإخراجي السريع والمميز.

الديكورات والموسيقى والأزياء

ديكورات الفيلم امتازت بقوتها وقدرتها على نقلنا بصريًا لمكان الأحداث، لكن الموسيقى التصويرية كانت أضعف من الديكورات أو على الأقل كانت أقل في المستوى العام من المستوى اللي ماشي عليه الفيلم وشعرنا طوال الوقت أن الموسيقى كانت محتاجه تطوير أكبر وأفضل.

الخلاصة

فيلم Gringo محتاج ناس مجنونة وبتحب الأفلام المجنونة علشان تقدر تستمتع به وتتفرج عليه وتتابعه للنهاية.

علشان تبقى عارف:

تقييم الفيلم على موقع IMDB وصل لـ 6 من 10.