The Definitive Guide to Living in the Capital , Cairo , Egypt

أفلام القتلة المتسلسلين بتهم مجموعة كبيرة من المشاهدين حول العالم، مش بس بسبب الأكشن والمطاردات أو قصص جرائم القتل، لكن علشان الغموض والأثارة اللي في النوعية دي من الأفلام، وده اللي قدر صناع Hangman يلعبوا عليه وينجحوا في تقديمه.

القصة

فيلم Hangman بيحكي عن محاولة رجال الشرطة فك لغز أحد القتلة المتسلسلين واللي بيقتل ضحاياه بناء على لعبة أسمها Hangman، ومحاولة الصحافة إلقاء الضوء على القضية وحل اللغز اللي بيكلف المدينة ضحية جديدة مع كل مرة بيفشل فيها المحققين في الوصول للجاني.

فريق العمل

فيلم Hangman من بطولة أل باتشينو وكارل أوربان وبريتاني سنو وسارا شاهي ومن تأليف فيل هوكينز وإخراج جوني مارتن.

الأداء التمثيلي

أل باتشينو بيقدر يقنعنا بأي دور يقوم بتأديته، حتى لو كان بيأدي نفس الشخصية للمرة السادسة أو السابعة في تاريخه، ولو كنتم متابعين جيدين لأل باتشينو واختياراته هتعرفوا أنه أدى شخصية المحقق البوليسي كل مرة بشكل مختلف عن اللي قبله وبقدرة تمثيلية قوية ومميزة.

السيناريو والحوار والإخراج

سيناريو الفيلم مترابط لكن محتاج كتير من التركيز أثناء المتابعة، يعني ننصحكم بعدم تناول الفيشار أثناء أحداث الفيلم علشان لا يلهيكم عن المتابعة ومحاولة معرفة مين هو القاتل المتسلسل، وممكن يشعر المشاهدين ببعض الملل خاصة في الأجزاء الأولى من الفيلم لكن مش هتعرفوا أهميتها وقوتها غير في بداية النهاية الخاصة بالأحداث.

الديكورات والموسيقى والأزياء

الديكورات والموسيقى التصويرية لعبت دور مهم علشان نشعر بالانسجام التام مع الأحداث والتعايش معها بشكل كامل، والحقيقة أن العوامل دي تم توظيفها بنجاح لخدمة قصة الفيلم في المقام الأول، وقدرت تكون عناصر أساسية ومهمة في صناعة الصورة السينمائية اللي ظهرت بمستوى متميز وجميل.

الخلاصة

فيلم Hangman هيعجب محبي أفلام الغموض والإثارة وتحقيقات الشرطة في جرائم القتل والاختفاء الغامض.

علشان تبقى عارف: تقييم الفيلم على موقع IMDB وصل لـ 5.1 من 10.