The Definitive Guide to Living in the Capital , Cairo , Egypt

احتفالات الهالوين بتشجع كتير من المنتجين على تقديم أفلام الرعب في الموسم ده تحديدًا. وسبب نزول أفلام رعب كتير في الفترة دي هي احتياج المشاهدين لفيلم رعب مميز يقضوا أمامه السهرة في السينما. بدون تشغيل دماغ أو محاولات لفهم أحداث معقدة. يعني رعب وبس! وفيلم Hell Fest بينتمي للفئة دي.

Hell Fest بيحكي عن مهرجان عيد الجحيم اللي بيتوجه له مجموعة من الأصدقاء. لكنهم بيكتشفوا أن هناك قاتل متسلسل بيستغل المهرجان علشان ينفذ مجموعة من جرائم القتل. بينما معظم الحضور متصورين أن اللي بيحصل مجرد جزء من العرض!

مخرج الفيلم جريجوري بولتكين شارك في التأليف والإخراج في أعمال قوية ومؤثرة ومعظمها بيدور في منطقة الرعب زي Get Out أو Happy death day أو Paranormal Activity: The Ghost Dimension وغيرها من الأعمال القوية. بالتالي إحنا بنتفرج على فيلم من محترف متخصص في مجال الرعب وعارف يقدم تيمات إخراجية ومشاهد مرعبة مؤثرة. لكن كنا نتوقع منه فيلم أقوى من كده. يعني كنا محتاجين نشوف حاجة جديدة ومختلفة مش فيلم تقليدي وخلاص.

أبطال الفيلم بيكس تايلور-كلاوس اللي قامت بدور تايلور ورين إدواردز اللي قامت بدور بروك وإيمي فورست في دور نتالي، كلهم قدروا يقدموا أدوار معقولة، إحنا متفهمين إنه المطلوب منهم بس طوال الوقت – بما إنه فيلم رعب- رسم انطباعات الرعب والهلع طوال الوقت. كمان مؤمنين إن أفلام الرعب مش بتعتبر اختبار حقيقي لقدرات التمثيل الحقيقية عند أبطال أي فيلم رعب.

على الرغم من أن قصة الفيلم تقليدية ويمكن التنبوء بكل أحداثها تقريبًا لكن سيناريو الفيلم السريع ومشاهده المتلاحقة قدرت تقدم لنا تجربة مرعبة بشكل ما. كل ده كان بيشتغل بانسجام مع الموسيقى التصويرية والديكورات اللي تم اختيارها بعناية علشان نشوف في النهاية فيلم رعب معقول وإن كان نمط الرعب فيه اعتمد على تكنيك Jump Scare أو القفز من الخوف المرتبط دايمًا بمشاهد خروج شخصي أو شىء من جانب خفي من الشاشة علشان يرعب بطلة الفيلم، والمشاهدين معاها.

Hell Fest مش أفضل فيلم رعب شوفناه مؤخرًا. لكن محبي أفلام الرعب هيشوفوه فيلم مناسب جدًا خاصة في فترة الهالوين. لكن ماتتوقعش منه حاجة جديدة.

علشان تبقى عارف: ميزانية الفيلم حوالي 5.5 مليون دولار!