The Definitive Guide to Living in the Capital , Cairo , Egypt

لما شوفنا إعلان فيلم It Comes at Night حسينا إن فيه كائن ظلامي سواء كان شيطان أو شبح بيقرب من المنزل وهيبدأ في قتل أفراد العائلة. لكن الحقيقة غير كده تمامًا، وكان لازم الإعلان يكون صادق مع المشاهدين أكتر من كده علشان كتير من المشاهدين اللي شافوا الفيلم بناء على الإعلان شعروا بالخداع. تعالوا نتعرف أكتر على الأحداث.

القصة

الفيلم بيحكي عن أسرة بتتحصن داخل أحد المنازل هربًا من خطر خارجي مجهول، لكن مع الوقت ومرور الأحداث بيبدأ الأشخاص الموجودين في المنزل يشعروا بجنون الارتياب والشك في في كل حاجة.

فريق العمل

الفيلم من تأليف وإخراج تيري إدوارد شولتز ومن بطولة جويل إجيرتون وكريستوفر أبوت وكارمين إجوجو وريلي كيو.

الأداء التمثيلي

الأداء التمثيلي للأبطال كان جيد، وقدر كل واحد من أبطال الفيلم يضعنا في الحالة النفسية الخاصة به بشكل جيد ومناسب مع طبيعة الدور الخاصة به طبعًا، والعبء الأساسي في التمثيل كان واقع على جويل إجيرتون واللي قدر يتحمل العبء ده ويوظف مشاعره كلها لخدمة دوره، ويقدم لنا أداء تمثيلي مميز يحسب له.

السيناريو والحوار والإخراج

يُحسب لسيناريو الفيلم أنه مش بيقدم لنا أجوبة على الأحداث بشكل مباشر، وبيورط المشاهدين معاه في منتصف الأحداث ويسيبنا لفترة بدون تقديم إجابات شافية. الأسلوب ده في كتابة السيناريو بيعجب الناس اللي بتحب الغموض والتشويق، أما اللي عاوزين يشاهدوا فيلم واضح من أول مشهد لأخر مشهد بدون أي فرصة للاستنتاج أو التفكير، هيضايقهم الأسلوب ده في السيناريو.

أما الحوار في الفيلم وعلى الرغم من قلته لكنه كان قوي وتم توظيفه بشكل جيد، وكل الأمور دي تحسب للإخراج اللي على الرغم من وجود بعض المشكلات فيه وعدم تمكنه من توظيف الحبكة فيه بشكل كويس لكنه في النهاية قدر يصنع فيلم مشوق ويستحق المشاهدة.

الديكورات والموسيقى والأزياء

ديكورات الفيلم كانت أكتر من رائعة ووقع عليها عبء شعورنا بالرعب في بعض المشاهد، لكن الموسيقى التصويرية كانت محتاجة تكون أقوى وأفضل من كده. وحسينا إن فيه عدم اهتمام بالموسيقى في الفيلم على حساب باقي العناصر.

الخلاصة

فيلم It Comes at Night مناسب للمشاهدين اللي مش عاوزين ياخدوا أجوبة مباشرة وجاهزة على أسئلتهم بخصوص الأحداث.

علشان تبقى عارف:

مخرج الفيلم تيري إدوارد شولتز هو أيضا مخرج فيلم Krisha.