The Definitive Guide to Living in the Capital , Cairo , Egypt

بداية من اليوم الأول لعرض سلسلة أفلام John Wick وإحنا عرفنا أننا أمام سلسلة أكشن مميزة ومتعوب عليها وتم الاهتمام بكل تفاصيلها.

كتابة السلسلة اعتمدت على خلق عالم كامل معتمد على الجريمة المنظمة، بداية من الشرطة غير الموجودة، مرورًا بالتعامل بعملة خاصة، ووجود فنادق، وبيوت أزياء، وحتى نظام اتصال وتواصل خاص بعالم الجريمة، وفي وسط كل ده بنشوف جون ويك المجرم المحترف اللي بيقرر يرجع لعالم الجريمة تاني بدافع الانتقام.

في الجزء الرابع من السلسلة،  بنشوف تكملة للأحداث السابقة، وعلى الرغم من أن فيه 3 أفلام سابقة في السلسلة. لكن متابعة الجزء الرابعة مش متوقفة عليهم، لكن اللي شاف الأجزاء السابقة متعته هتكون مضاعفة، لأن صناع John Wick: Chapter 4 قرروا يضاعفوا من كمية كل حاجة عجبت الناس في الأجزاء السابقة. وأول حاجه طبقوا عليها الكلام ده هو مشاهد الاشتباكات.

مشاهد الاشتباكات احتلت نصيب الأسد في John Wick: Chapter 4 وبنتكلم هنا عن اشتباكات بالسلاح الأبيض والناري، في أماكن مفتوحة ومغلفة، في دول مختلفة حوالين العالم. اشتباكات في الصباح والمساء، واشتباكات مع أبطال مصارعة وكونج فو ورجال عصابات، وماكانش ناقص غير أن كيانو ريفز يشتبك مع المخرج والمونتير أو يطلع من الشاشة يضرب الجمهور!

بس ميزة الفيلم هي كمان تعتبر من عيوبه، بمعنى أن في مقابل إنتاج كل مشاهد الحركة دي، الحبكة الدرامية كانت ضايعة. وبقى الفيلم مجرد مشاهد اكشن ورا بعضها بيربطها بعض الأحداث الخفيفة اللي ماحدش مهتم بيها أصلًا.

مافيش كلام عن مستوى الأكشن مع John Wick: Chapter 4 بنشوف أكشن من الطراز الأول، خاصة مع تقدم كيانو ريفز في العمر واستغرابنا من قدرته على الحفاظ على قدراته البدنية ومستوى لياقته، وخاصة مع حفاظ السلسلة على نفس نمط الأكشن بتاعها زي الجمع بين حركات الكونج فو واستخدام السلاح، وهو فن قتالي اسمه (gunfu) أصبح منتشر بعد نجاح سلسلة جون ويك. لكن الأمر لا يخلو من بعض الغرابة وغياب المنطق زي مشهد القتال في الحفلة الراقصة، وإزاي الراقصين كانوا بيأدوا حركاتهم بشكل ألي بدون تأثر من ضرب النار والقتل اللي بيحصل حواليهم.

كيانو ريفز في دور البطولة عمل مجهود بدني يحسد عليه، و دوني ين في دور كين كمان عمل أداء اسطوري خاصة وهو بيجسد دور رجل كفيف، كمان عجبنا دور سكوت أدكنز جدَا.

سلسلة جون ويك سلسلة أفلام لا تنسى، وفي رأينا هي من أحلى سلاسل أفلام الأكشن في العالم. لكن بعد استنفاذ السلسلة لكل التنويعات اللي ممكن تعملها في الأكشن، مطلوب منها يا تفكر بره الصندوق علشان تنتج أجزاء جديدة، أو تتوقف السلسلة هنا، لأن الاستمرار بنفس الطريقة مش هيؤدي غير للتكرار بدون أي تجديد يذكر.