The Definitive Guide to Living in the Capital , Cairo , Egypt

بدون مقدمات كتير، فيلم Jojo Rabbit بيحكي عن طفل بينضم لمعسكر تدريب تابع للنازيين، بيتدرب فيه على القتل وأعمال العنف والحرب، لكنه في نفس الوقت بيكتشف إن والدته مخبية في بيتهم بنت يهودية، ومن هنا بيقع في صراع بين إنسانيته وبين اللي اتدرب عليه كطفل نازي.

فيلم Jojo Rabbit واخد سكة السخرية والكوميديا علشان يناقش قضية “العنصرية” وبيورينا قد إيه الإنسان العنصري بيتخلى عن إنسانيته، وده بيخليه يشوف باقي البشر مجرد كائنات لا تستحق الحياة، كل ده زي ما قولنا في إطار من الكوميديا والسخرية، خصوصًا مع ظهور شخصية “هتلر” اللي قدمها مؤلف الفيلم ومخرجه “تايكا وايتيتي” بشكل ظريف.

ولأن الفيلم بيناقش قضية مهمة، كان لازم أداء الممثلين يكون جيد ومتوازن بين الكوميديا والجد في نفس الوقت، وده اللي قدرت عليه الجميلة “سكارليت جوهانسون” و”تايكا وايتيتي” في دور “هتلر” اللي كان كوميدي جدًا.

أما الطفل “رومان جريفين دافيس” اللي نقدر نعتبره بطل الفيلم، قدم أداء أكثر من رائع، ووصل لنا بأداؤه إزاي إن العنصرية ممكن تخلي الإنسان مكروه، وكل ده بدون ما تفارقنا البسمة من المواقف الكوميدية اللي بيتعرض لها واللي اتقدمت بشكل جميل جدًا على الشاشة.

مش ممكن نعتبر فيلم Jojo Rabbit مجرد فيلم خفيف، وده لإنه بيقدم مناقشة في منتهى الذكاء للعنصرية اللي لسه موجودة في العالم لحد النهارده على الرغم من كل المجهودات لمحاربتها.