The Definitive Guide to Living in the Capital , Cairo , Egypt

لما تبقى عاوز تعمل فيلم أكشن بميزانية قليلة، مافيش مشكلة.. بس على الأقل خصص جزء من الميزانية دي للشغل على القصة بشكل أحسن شوية من اللي شوفناه في Kill Chain علشان القصة كانت واقعة ومضروبة بالنار.. وللأسف أخدت معاها السيناريو وسقطوا بالفيلم سقوط غير عادي.

بصراحة مش عارفين، هل فعلًا ده سقوط مش طبيعي، ولا ده خلاص بقى العادي من نجم هوليوود “نيكولاس كيدج” اللي 99% من أدواره اللي قدمها مؤخرًا كانت أدوار ضعيفة، في أفلام أي كلام بميزانية محدودة، وبقينا بنسأل هل هنشوف عودة جديدة لبطل Con Air و The Rock وغيرها من الأعمال القوية، ونشوفه واقف على رجله تاني؟.. لكن للأسف، بعد Kill Chain واللي شوفناه حسينا إن دي بقت أمنية صعب تتحقق.

في Kill Chain بنشوف نيكولاس كيدج في دور راجل صاحب فندق بيتورط في عالم تجارة الماس غير المشروعة، وده هيحول الفندق لساحة لتبادل إطلاق نار طول الفيلم تقريبًا، وبنشوف القصص الفرعية اللي المخرج والمؤلف “كين سانزيل” كان كويس في إنه يفتحها.. لكنه فشل تمامًا في إنه يقفلها.

انخفاض الميزانية كان هو السبب الرئيسي اللي سيطر على كل حاجه في الفيلم تقريبًا، بدايةً من زوايا التصوير اللي تم اختيارها بدون احترافية، ونهايةً بنمط التصوير نفسه، من خلال اختيار كادرات ضعيفة ومافيهاش روح علشان تقدم لنا في النهاية مشاهد محفوظة ومفيش فيها جديد.