The Definitive Guide to Living in the Capital , Cairo , Egypt

أفلام (الديستوبيا)، أو الأفلام اللي بتناقش مستقبل الأرض بعد كارثة كبيرة وحرب عالمية، من الأفلام المشهورة بشكل عالمي. واللي بتحقق نجاح مبهر وسط قطاع كبير من الجمهور. ودي النقطة الأقوى اللي لعب عليها صناع فيلم Mortal Engines في تقديم فيلمهم.

الفيلم بيقدم المدن المتبقية بعد الكارثة اللي تعرضت لها الأرض، كمدن متحركة مش ثابتة. وأن المدينة الأقوى بتهاجم وتتغلب على المدينة الأضعف، وتسرق مواردها. لكن للأسف على الرغم من الفكرة البراقة للمدن المتصارعة، وفكرة خلق عالم كامل له قوانينه الخاصة والمختلفة عن قوانينا. إلا أن تنفيذ كل ده على الشاشة كان غير موفق في جانب كبير منه حسب وجهة نظرنا.

المشكلة هنا في رأينا ترجع للمخرج “كريستيان ريفرس”، اللي بيخوض أول تجاربه الإخراجية من خلال العمل ده. وكان من الواضح أنه عاوز يستغل كل حيله الإخراجية، علشان يقدم لنا فيلم فيه أكشن ومغامرة، مع خيال علمي ورومانسية. لكن في النهاية قدم لنا فيلم ضعيف ومش قادر يركز على جانب واحد من اللي بيشتغل عليهم.

من عيوب الفيلم في وجهة نظرنا، الاعتماد المكثف على المؤثرات الخاصة والحيل السينمائية، أكتر من التركيز على الأداء التمثيلي نفسه. علشان مانظلمش الفيلم، هنرشحه للمشاهدة للشباب اللي بيحبوا أفلام الغامرة والحركة، مع الخيال العلمي والخدع السينمائية المبهرة.