The Definitive Guide to Living in the Capital , Cairo , Egypt

الحقيقة إننا بنحب قصص النجاة بالنفس والأرواح من الكوارث الطبيعية. وأكيد ناس كتير حوالين العالم بتحب نفس النوعية دي من الأفلام. وده في رأينا له سببين: الأول هو إننا بنتخيل نفسنا في نفس السيناريو وبنعجب بالأفكار الذكية الجريئة اللي بياخدها أبطال العمل، والثاني هو أننا زي ما نكون بنرسم حوالين نفسنا دايرة تحمينا من الأخطار دي، من خلال مشاهدة ناس تانية بتتعرض لنفس الخطر وتنجو منه. وده اللي لعب عليه صناع فيلم Nowhere.

فيلم Nowhere بيحكي عن زوج بيحاول يهرب مع زوجته الحامل، من اضطهاد الحكومة اللي بتقتل كل الحوامل في خطة مستقبلية لتحديد النسل.

لكن خطة الهروب بتتحول لكارثة، لما يتم فصل الأب عن الأم، وتجد الأم – اللي باقي لها أيام قليلة على الولادة- نفسها محاصرة في حاوية بضائع ضخمة في منتصف المحيط. بدون أي فرصة للنجاة.

باستخدام البضائع المتاحة أمامها، وبكثير من المعجزات، بتحاول بطلتنا (ميا) اللي قامت بدورها أنا كاستيلو، أنها تظل على قيد الحياة، في وسط ظروف مناخية وبيئية صعبة جدًا. ظروف خلتنا نضع إيدنا على فمنا في كتير من المشاهد لمجرد تخيل إننا مكانها. ومن هنا بتيجي عظمة المخرج آلبرت بينتو في أنه يصور لنا الظروف الصعبة اللي بتعيشها البطلة.

كان ناقص بس إن السيناريو يورينا شوية مشاهد في بداية Nowhere نعرف من خلالها أي خلفية عن حياة ميا قبل الكارثة، وياسلام لو كانت المشاهد دي فيها بعض المهارات اللي بنشوفها عندها بعد كده. علشان يحصل تبرير سينمائي للمهارات اللي بنشوفها بيها في النصف الثاني من الأحداث. بس ده للأسف ماحصلش.

أداء آنا كاستيلو كان أكثر من رائع. وقدرت تورينا التغير النفسي لها على مدار الوقت من واحدة فاقدة للأمل لإنسانة بتحاول تبقى على قيد الحياة بأي شكل. ودي حاجه تعرفنا إن الحياة دايمًا بتنتصر مهما كان الأمل في البقاء ضعيف.

صناع الفيلم كان عندهم أكتر من سيناريو يقدروا من خلاله يخلوا الفيلم أسهل بالنسبة لهم. زي التصوير على البر مثلًا بدل البحر، أو التصوير بدون ظروف مناخية صعبة. لكن واضح انهم اختاروا الطريق الأصعب في كل حاجة، وفي النهاية نجحوا يقدموا لنا فيلم له نكهة مختلفة ومرعب ومثير في كل لقطة منه.

أحلى حاجة عجبنا في Nowhere هي الرسالة اللي بيحاول يوصلها. أن الحياة دائمًا بتنجح تلاقي لنفسها صيغة وسط الموت والدمار، وأن الرغبة في البقاء هي أكبر محفز للإنسان علشان يكافح كل يوم.