The Definitive Guide to Living in the Capital , Cairo , Egypt

لما نتكلم عن تعاون شركتين بحجم “بيكسار” و”ديزني” في عمل مشترك، النتيجة لازم تكون مبهرة وقوية إلى أقصى حد، علشان كده اللي شوفناه في Onward كان عمل شبه متكامل على جميع الأصعدة.

فيلم Onward بيحكي عن أخين أبوهم مات في سن صغيرة، أمهم هتديهم ورث من أبوهم عبارة عن عصاية سحرية عندها القدرة إنها ترجع والدهم لمدة يوم واحد بس، لكن علشان يتم السحر بشكله الصحيح بيدخل الأخين في مغامرة طويلة مش عاوزين نحرقها لكم.

المخرج “دان سكانلون” قدر يقدم أفضل ما عنده علشان يورينا في النهاية صورة مبهرة وتحريك رائع للشخصيات، وطبعًا الفضل هنا مش للمخرج بس، إنما كمان للإمكانيات الإنتاجية الهائلة لبيكسار وديزني، وخبرتهم الطويلة في صناعة أفلام الأنيميشن.

الجميل في Onward إنه مش بس بيقدم مغامرة جميلة للصغار، لكن هتلاقوا فيه رسائل للكبار، مغلفة بتغليف أنيق من الألوان المبهرة اللي بتسرق عيوننا، والأداء الصوتي المميز من كل أبطال الفيلم تقريبًا.

الجميل في Onward كمان إنه مش بيعزف على الأوتار المعتادة لديزني أو بيكسار، لكن بيحاول يكسر القوالب دي ويقدم تيمته الشخصية حتى لو خرج عن الإطار المتوقع له، وللأسف مش هنقدر نشرح النقطة دي أكتر من كده علشان مانحرقش الأحداث، لكن لما تشوفوا الفيلم هتفهموا إحنا نقصد إيه.

ولأن الحلو ما يكملش كان نفسنا Onward يكون مطعم بأغاني واستعراضات وموسيقى تصويرية قوية علشان يكون عمل فني فيه كل العناصر.