The Definitive Guide to Living in the Capital , Cairo , Egypt

أصعب المواجهات على الإطلاق، هي اللي بيضطر الانسان يخوضها ضد نفسه. علشان النفس لما بتعلن الحرب علينا بتكون حرب داخلية، عكس العدو الخارجي الواضح واللي الإنسان بياخد حذره منه ويعمل له ألف خطوة دفاعية.

هي دي المشكلة اللي وجدت جيسكا (قامت بالدور ريني كوالي) نفسها فيها، لما اتحبست في  غرفة بدروم شقتها، لوحدها، بينما طفلتها الصغيرة ورضيعها في غرفتهم، في وجود شخص متحرش بالأطفال حر طليق في المنزل!

بينما يتوقع أي حد يسمع القصة، أن الصراع الأساسي بين جيسكا والمتحرش، لكن الحقيقة أن صراعها الأساسي كان بينها وبين نفسها، وأنها مدمنة سابقة، وضعتها الظروف مع جرعة مخدرات في غرفة مغلقة. مش بس المواجهة كانت مع المخدرات، لكن مع القناعات الدينية والإنسانية لجيسكا. ودي نقطة القوة اللي لعب عليها فيلم Shut In.

نوعية الأفلام زي Shut In بتكون أفلام منخفضة الميزانية، وغالبًا بتكون مش محتاجة فريق عمل كبير. بنتكلم هنا عن فيلم كامل اتعمل بـ ٧ ممثلين فقط. والتصوير بدون مشاهد خارجية تقريبًا، وفي ديكور واحد معظم الوقت. ورغم ده، الحبكة والقصة تغلبت على الميزانية القليلة واستمتعنا بالفيلم. والفضل هنا يعود للكتابة العظيمة من ميلاني توست.

الأداء التمثيلي من ريني كوالي كان عظيم، والطفلة لوسيانا فانديتي عملت دور جميل رغم أنها ما ظهرتش في مشاهد كتير. ولولا تمثيلهم الجميل كان شعورنا ببطء إيقاع الفيلم هيكون أكبر. وهي دي النقطة السلبية اللي لاحظناها في الفيلم.

Shut In بينضم لقايمة طويلة من الأفلام اللي قدرت تجمع بين الميزانية القليلة وحفاظها على شغف الجمهور بيها، لكن أقل مقارنة بينة وبين أفلام زي Buried أوDon’t Breathe  هنلاقي أن الأفلام دي تفوقت على Shut In والسبب هنا في الإيقاع. لأن رغم أن قصة الفيلم قوية جدًا ومُبشرة وليها أبعاد فلسفية كتير، لكن إيقاع الفيلم كان واقع، ولو شوفنا الفيلم بضعف السرعة اللي بيتم عرضه بيها ماكناش هنحس بأي اختلاف، ودي سقطة كبيرة من المخرج  دي.جيه. كاروسو.

أخر كلامنا، قبل ما نسأل نفسنا عن تصرفنا لو لقينا نفسنا محتجزين في غرفة زي جيسكا، لازم نسأل نفسنا، هل هنكون جاهزين للدخول في حرب مفتوحة ضد نفسنا؟!