The Definitive Guide to Living in the Capital , Cairo , Egypt

لو قولنا للناس إن ممكن شخص يموت وبعدين حبيبته أو مراته تبقى حامل منه بعد ٥ سنين كاملة من وفاته، هيقولوا إن ده مستحيل، لكن في الحقيقة هو ده اللي حصل في فيلم Strange But True.

فيلم Strange But True بيحكي عن “ميليسا” واللي قامت بدورها “مارجريت كوالي” اللي بتقرر ترجع لعائلة حبيبها السابق “فيليب” واللي قام بدوره “نيك ربنسون” علشان تقول لهم إنها حامل منه، على الرغم من مرور ٥ سنوات على وفاته.

الخبر طبعًا بيزلزل الأسرة، وبيخلق حالة من عدم التصديق، وبيفتح سلسلة كبيرة من الاحتمالات والقصص الجانبية، واللي نجح المخرج “روان آثال” إنه يخلينا نتابعها بشغف، علشان نعرف إزاي حاجة زي دي ممكن تحصل.

المميز في Strange But True إنه مش بس بيطرح الأسباب المنطقية اللي ممكن تخلي حاجة زي دي تحصل، لكن كمان بيطرح نظرية من نظريات ما وراء الطبيعة، وبيخلي المشاهد يفكر في كل الاحتمالات الممكنة، لحد ما يوصل للحقيقة.

لكن المشكلة الأساسية كانت في سيناريو “إيريك جارسيا” واللي كان سبب في مط الأحداث لحد ما نوصل للحقيقة، وطبعًا المط ده أضر بالفيلم، وخلانا نحس عند مرحلة معينة بإحساس “ما حد يقول لنا إيه اللي حصل وخلاص يا جدعان” والشعور ده نتيجة المط والتطويل الزايد قبل كشف الحقيقة.

من ناحية ثانية بنشوف أداء تمثيلي جيد جدًا من كل أبطال الفيلم، وبنشوف بطلنا المصري “مينا مسعود” في مشاهد قصيرة من الفيلم، لكن حسستنا بالفخر وإحنا بنتفرج عليه.