The Definitive Guide to Living in the Capital , Cairo , Egypt

من وقت للتاني بنحب نفصل دماغنا بفيلم يخلينا ننسى الدنيا واللي فيها ونستمتع بحوالي ساعتين من الكوميديا، ولو معانا أطفال بتكون المتعة مضاعفة خاصة لو كنا بنتفرج على فيلم أنيميشن.

فيلم Teen Titans Go! To the Movies بيحكي عن مجموعة من الأصدقاء المهووسين بقصص الأبطال الخارقة للعادة، الأمر اللي بيجعلهم يدخلوا في سلسلة طويلة من المواقف اللي بتختلط فيها الكوميديا بالمغامرة.

تأليف أرون هورفاث لقصة الفيلم تضافر مع إخراج بيتر ميكايل علشان يقدموا لنا في النهاية توليفة جيدة من الكوميديا مع المغامرات، لكن من ناحية تانية لازم المشاهد يكون عنده معلومات قوية عن عالم الأبطال الخارقين علشان يفهم العالم والأحداث اللي بيدور فيها الفيلم.

المواقف الكوميدية وإخراجها الفني ماكانش هيكون لهم طعم من غير الأداء الصوتي المتميز من كل أبطال الفيلم تقريبًا، وعلى رأسهم كريستين بيل في دور جيد ويلسون وخاري بايتون صاحب صوت شخصية سايبورج، وحتى نيكولاس كيدج اللي قدم صوت شخصية سوبرمان. ومن الأمور الكويسة جدًا حرص الفنانين الكبار على المشاركة الصوتية في أفلام الأنيميشن.

طريقة تحريك الشخصيات على الشاشة وتقنيات العرض كانت جيدة وساعدت بشكل كبير على دخولنا في عالم الأحداث بسهولة، لكن من ناحية تانية بنعيب على الفيلم إنه مش هيكون واضح غير للناس اللي بتحب أفلام السوبر هيروز، لإنهم لو ماعندهمش فكرة عن الشخصيات دي مش هيفهموا الفيلم.

Teen Titans Go! To the Movies فيلم أنيميشن جيد نقدر نفصل من خلاله دماغنا من الضغوط، إحنا وباقي أفراد الأسرة، وبنرشحه للمشاهدة في الويك إند بعيد عن زحمة المدرسة والدروس.

علشان تبقى عارف: تقييم الفيلم على موقع IMDB هو ٦.٨ من ١٠.