The Definitive Guide to Living in the Capital , Cairo , Egypt

يوم بعد يوم بنكتشف أد إيه كان المخرج (كريستوفر نولان) عبقري، لما قدم تصوره الشخصي عن شخصية باتمان في ثلاثية هوليوودية خالدة، هي The Dark Knight.

لكن ولأننا عاشقين لشخصية بات مان من التسعينيات، كُنا عارفين كويس أن ده مش الخيط الأساسي اللي اتبنت عليه شخصية بات مان. وأن “نولان” أخدنا لمنطقة اسقاطات سياسية واجتماعية على أمريكا وأوضاعها الداخلية، وابتعدنا عن الخيط الأساسي لشخصية الرجل الوطواط محارب الجريمة الساعي للانتقام. فيلم The Batman هو محاولة للعودة بالأحداث لسياقها الأول. لكن هل المحاولة ناجحة؟.

في The Batman بنشوف مدينة جوثام وهي غرقانة، وفيه حالة من الفساد الإداري والمالي، فساد انتشر مش بس في المؤسسات الاقتصادية والحكومية، لكن كمان في أخلاق الناس نفسها، الأمر اللي بيخلي الشرطة تستعين بالرجل الوطواط (قام بالدور روبرت باتينسون) من خلال الإشارة الضوئية الشهيرة، علشان يرجع الأمور لنصابها من جديد.

من خلال أحداث The Batman بنشوف الشخصية الأصلية للرجل الوطواط، المحارب الشرس اللي بينتقم لوفاة أبوه وأمه، واللي بيسخر التكنولوجيا لخدمته، لكن المرة دي بنشوفه بعد سنتين فقط من تكريس نفسه لمواجهة الجريمة، بالتالي مش بنشوف تطور تكنولوجي أو مادي كبير في قدراته، كمان بنشوفه كمحقق في جريمة غامضة لشخصية شريرة غامضة بتهوى التلاعب بالألغاز هي (The Riddler) كل ده بمساعدة المرأة القطة أو Cat woman واللي قامت بدورها زوي كرافيتز.

أحلى ما في الفيلم هو أنه نجح في وضع النقاط على الحروف لشخصية باتمان جديدة ومختلفة عن أفلام كريستوفر نولان، واستعان بشخصيات شريرة ما ظهرتش في سلسلة نولان، مع تجاهل شبه تام لشخصية بروس وين اللي هي الشخصية العلنية لبات مان، واللي ما ظهرتش إلا في مشاهد قليلة، والحقيقة أن وجود شخصية بروس وين كانت بتضمن تحقيق بعض الكوميديا، وكتير من المتعة لما بنحس أن شخصية بات مان ممكن يتم كشفها، وهنا بنلاقي أن مات ريفز مؤلف ومخرج The Batman قرر يستغنى الكوميديا، وعن المفارقات بين شخصية بات مان العلنية والسرية، في مقابل أنه يثبت قواعد جديدة للعبة، وأشرار جدد، وحتى تاريخ مختلف للشخصية، بدون تضييع الوقت في سرد القصة المحفوظة عن طفولة بروس وين ومقتل أسرته.

ده بالنسبة للقصة والسيناريو.. بالنسبة لتنفيذ ده على الشاشة. لاحظنا طبعًا سيطرة اللون الأسود على كل عناصر الفيلم تقريبًا، خصوصًا الإضاءة اللي لعبت على توازنات الأحمر والأسود بشكل ملحوظ. وده مفهوم لفيلم المفترض أنه بينتمي لعالم الظلام، لأنه بيحكي عن شخصية (وطواطية) بالأساس. لكن جرعة الظلام كانت أزيد من اللازم في كتير من المشاهد وكنا بنبذل مجهود كبير علشان نقدر نشوف كويس ودي حاجه ضايقتنا.

الأداء التمثيلي لـ(روبرت باتينسون) كان معقول، لكنه كان مفتقر لـ(هيبة) باتمان. ونتمنى تكون دي مجرد بداية لسلسلة أفلام هنشوف فيها تطور لشخصية باتمان على مر الوقت، ساعتها ممكن نغفر لباتينسون أنه ماقدرش يعيشنا كويس في أجواء الشخصية. من ناحية تانية  شوفنا أداء أسطوري من كولن فاريل في شخصية (بنجوين)، مدعوم بمكياج خرافي خلانا نشعر أننا فعلا أمام شخصية مختلفة تمامًا.

The Batman مش أحسن فيلم اتعمل لشخصية بات مان، لكنه خروج آمن من عبائة كريستوفر نولان، ونواة أولى لسلسلة أفلام نتمنى تكون مميزة، عن بطلنا المفضل في عالم السوبر هيروز.