The Definitive Guide to Living in the Capital , Cairo , Egypt

العلاقة بين  البشر والكلاب هتفضل واحدة من أقوى العلاقات اللي نشأت بين البشر والحيوانات بشكل عام، وتم تناولها في عدد كبير من الكتب والروايات والمسلسلات والأفلام قبل كده، لكن هل هيقدر The Call of the Wild يقدم أي جديد في المنطقة دي؟

فيلم The Call of the Wild بيحكي عن كلب بيعيش حياة مملة نوعًا ما، وبعدين بيتعرف على راجل هياخده معاه في رحلة بتغير حياتهم هما الأتنين تمامًا بشكل مش عاوزين نحرقه عليكم أكتر من كده.

الأداء التمثيلي لـ “هاريسون فورد” كان أكثر من رائع، والحقيقة إن الجميل في “فورد” إنه قادر يجسد أي شخصية بتتطلب منه، والأروع إنه بيجسد شخصيات بتتناسب مع سنه، لكن في الحقيقة كان نفسنا مساحة دوره تكون أكبر، لكن اللي عوض ده هو استخدام صوته كراوي للأحداث.

مستوى الخدع السينمائية في The Call of the Wild كان ممتاز، وملعوب باحترافية كبيرة أوي، وده هيفتح باب كبير في المستقبل لتوظيف المؤثرات الخاصة لصناعة أفلام كاملة من الألف للياء، وهيرفع سقف الخدع السنيمائية على المخرجين وصناع الأفلام.

كان ممكن السيناريو يضيع الفيلم، وينسف كل المجهود الجبار ده، لو كان ضعيف أو مش مترابط، لكن في الحقيقة السيناريو كان جيد جدًا ومترابط، رغم إن القصة معروفة لقطاع كبير من المشاهدين، وده كان تحدي كبير نجح فيه الفيلم.