The Definitive Guide to Living in the Capital , Cairo , Egypt

تعمل إيه هوليوود لما تبقى عاوزه تنتج جزء جديد من سلسلة أفلام ومش لاقيه أفكار لمناقشة السلسلة في المستقبل؟ بسيطة… نتكلم عن نفس الفكرة لكن في الماضي وإزاي بدأت القصة من الأساس… كنا متوقعين إن الفيلم يكون ضعيف لكن في النهاية حسينا إن الفيلم فعلًا قوي ورغم أن الفكرة مكررة لكن تنفيذها على الشاشة كان مختلف ومميز.

فيلم The First Purge بيحكي عن بداية يوم التطهير، وإيه الأحداث اللي أدت لبداية اليوم ده. لو أنت مش عارف إحنا بنتكلم عن إيه… سلسلة The purge بتحكي عن يوم بيتم إتاحة ارتكاب أي نوع من الجرائم (بما فيها جرائم القتل) بدون أي حساب أو عقاب لمدة 24 ساعة. وفي كل جزء من أجزاء السلسلة بنشوف أحداث يوم من أيام التطهير.

كل أبطال الفيلم قدموا أداء تمثيلي مميز، خاصة إيلان نويل ولكس سكوت دافيس واللي كان أدائهم قوي ويستحق الاحترام. كمان أبدع المخرج جيرارد ماكموري في إخراج وتقديم مشاهد الأكشن والمطاردات، خاصة أن المؤلف جيمس ديموناكو قدر يقدم التبريرات المناسبة لكل موقف من خلال سيناريو قوي ومحكم.

الديكورات وأماكن التصوير لعبت دور مهم في تقديم الأكشن بشكل مناسب وقوي، وقدرت تخلينا نعيش كل مشهد كأنه بيحصل بالفعل في حياتنا. وأكبر متعة حسينا بيها هي لما بنسأل نفسنا هنعمل إيه لو مرينا بأحداث يوم التطهير في حياتنا الشخصية؟

المشاهدين اللي ماشافوش أجزاء السلسلة اللي فاتت ممكن يتابعوا الجزء الحالي بدون مشاكل، لكن لو شافوا الأجزاء السابقة متعتهم هتكون أكتر وأفضل.

من الآخر The First Purge فيلم أكشن قوي وسلسلة قائمة على الرعب الممزوج بالأكشن ونتوقع أنتاج المزيد من الأعمال على نفس النهج وتابعة لنفس السلسلة في المستقبل.

علشان تبقى عارف:

بيحمل الفيلم اسم آخر في الولايات المتحدة الأمريكية والمملكة المتحدة وهو (The Purge: The Island).