The Definitive Guide to Living in the Capital , Cairo , Egypt

فيلم النهارده بينتمي لعائلة الأفلام اللي بتعيشنا في الكوميديا والأكشن والجريمة في وقت واحد، وبتقدم مكس غريب بين 3 أنواع مختلفة من تيمات الأفلام، وبشكل عام تعتبر “بوليوود” و”هوليوود” من أكتر المدارس اللي بتقدر تقدم التيمات دي مع بعضها، ولما بنتكلم عن “هوليوود” وأفلام الجريمة الكوميدية، مش هنلاقي أحسن من المخرج “جاي ريتشي” علشان يقدم النوعية دي من الأفلام.

فيلم The Gentlemen بيحكي عن “ميكي بيرسون” اللي قام بدوره “ماثيو ماكونهي” وهو المجرم الأمريكي اللي بيقرر يبيع إمبراطورية تجارة المخدرات اللي أسسها في انجلترا، وده القرار اللي بيغير كل الأحداث وبيدخلنا في سلسلة من الصراعات في عالم العصابات الأمريكية والإنجليزية سوا.

من أفضل الأمور اللي عجبتنا في الفيلم هي الأداء التمثيلي المميز من “ماثيو ماكونهي” وباقي الأبطال “هيو جرانت” و”تشارلي هونام” و”كولن فاريل” الأسماء دي مش بس أسماء كبيرة، لكن كمان قادرة تخلق هارموني بينها وبين بعضها علشان يقدموا لنا في النهاية أحداث قوية وكوميديا ممتعة وسط لحظات مميزة من التشويق والإثارة.

لكن مش ممكن نتكلم عن نجاح The Gentlemen من غير ما نتكلم عن إخراج “جاي ريتشي” المميز واللي كان سبب رئيسي في ظهور الفيلم بالشكل العظيم ده، وده واضح في كل تفصيلة من تفاصيل الأحداث، بصمة ريتشي كانت واضحة خاصةً إنه بيلعب في ملعبه المفضل، أفلام العصابات وعالم الجريمة، واللي قدر يضيف عليه بصمته الكوميدية كمان.

لاحظنا إن سيناريو الفيلم كان منحاز أكتر للكوميديا، حتى في مشاهد الأكشن والمطاردات كان العامل الكوميدي موجود طول الوقت، وللأسف الموضوع ده ممكن يكون محبط للناس اللي متوقعة إن الفيلم يكون فيه جرعة أكشن عالية، لكن في نفس الوقت مانقدرش نتضايق قوي من جرعة الكوميديا المختلطة بالأكشن دي، خاصةً لو معمولة بشكل كويس زي ما شوفنا في الفيلم.