-
جاري أولدمانرايان رينولدز...
-
حركة ومغامراتكوميدي
-
باتريك هيوز
-
في1 Cinema
Mohamed Hamdy
“مزيج من الأكشن والكوميديا”.. هو ده الجديد والمميز في The Hitman’s Bodyguard اللي ما اعتمدش فقط على الحوار اللي بيضحك، لكنه اعتمد كمان على المواقف الكوميدية.
القصة
فيلم The Hitman’s Bodyguard زي ما هو واضح من الاسم، بيحكي عن واحد من أفضل الحراس الشخصيين في العالم، واللي بيتم تكليفه بمهمة حراسة وتأمين وصول قاتل محترف لمحكمة العدل الدولية، علشان يدلي بشهادته. ومع احتدام المواقف بتظهر كتير من الأحداث الكوميدية من خلال محاولة الوصول بسلام للمحاكمة.
فريق العمل
الفيلم من بطولة رايان رينولدز، وصامويل إل جاكسون، وجاري أولدمان، وسلمى حايك. ومن إخراج باتريك هيوز. ومن تأليف توم أوكونر.
الأداء التمثيلي
الأداء التمثيلي لريان رينولدز وصامويل إل جاكسون كان أكتر من رائع. لكن رينولدز كان متقدم خطوة أو أكثر على جاكسون، اللي كان واضح أنه مش في الفورمة بنسبة 100%. لكن مانقدرش ننكر قدرته التمثيلية العالية. كمان ماينفعش ننسى دور سلمى حايك اللي حسينا إنه صغير بالنسبة لإسمها، لكن أدائها التمثيلي فيه كان كويس وقوي.
السيناريو والحوار والإخراج
سيناريو الفيلم مكتوب بحيث مايسيبش لحظة واحدة للمشاهد بدون كوميديا وضحك، أو حتى مطاردات وأكشن. والحوار ساعد بشكل كبير علشان الكوميديا تكون مظبوطة على الفيلم بالمقاس. وطبعًا الإخراج نجح في توظيف كل العناصر دي علشان يقدم لنا في الآخر تجربة حركة وكوميديا مميزة وجميلة.
الديكورات والموسيقى والأزياء
ديكورات الفيلم كانت بتعبر عنه بشكل جميل، لكن حسينا أن الديكورات كانت محتاجة تكون أقوى من كده، لكن عمومًا مش بنفكر في الديكورات بنسبة كبيرة وإحنا بنتفرج على فيلم كوميدي بالأساس، أما الموسيقى الحماسية واللي تم توظيفها بقوة في الفيلم فكانت مؤثرة وممتازة.
الخلاصة
فيلم The Hitman’s Bodyguard نجح في توظيف الأكشن لخدمة الكوميديا، والكوميديا في خدمة الأكشن بشكل رائع ومختلف.
علشان تبقى عارف:
تصنيف الفيلم على موقع IMDB 7.3 من 10 وشارك في التقييم حوالي 8000 مستخدم للموقع.