The Definitive Guide to Living in the Capital , Cairo , Egypt

على الرغم من الضجة والشهرة اللي حققتها أفلام رعب كتير جدا تناولت الأطفال الرضع أو صغار السن وأمهاتهم كمادة خصبة لتقديم قصص وسيناريوهات مرعبة، زي أفلام The omen و The Exorcist وغيرهما من الأعمال، إلا أن إعادة اللعب على نفس الوتر اليوم بدون تقديم قصة جيدة أو حبكة مختلفة بيكون محبط لكتير من المشاهدين. وده كان شعورنا ناحية فيلم The Lullaby.

فيلم The Lullaby بيحكي عن (كلوي) اللي بتقوم بدورها رينية سوارت، واللي بترجع لمدينتها الأصلية علشان تقيم فيها مع والدتها، خاصة بعد ولادتها لطفلها الأول. لكن مع الوقت بتبدأ مجموعة من الأحداث الغامضة والمريبة في الحدوث بشكل مرعب. وبتتوالى الأحداث اللي مش عاوزين نحرقها عليكم.

على الرغم من أن القصة تعتبر مكررة ومافيهاش أي جديد، كان عندنا شعور أن المخرج داريل رودت ممكن يقدم فيلم قوي. خاصة أنه مخرج قديم وقدم حوالي 50 عمل. لكن على الرغم من الأعمال اللي أخرجها لم نلاحظ منهم أفلام علقت في ذاكرة المشاهدين أو تركت أثر قوي نقدر نفتكره كعمل مهم ومؤثر. وللأسف The Lullaby مش استثناء عن الأفلام دي.

بالنسبة للأداء التمثيلي فمن الصعب نحكم على الأداء التمثيلي للأبطال من خلال فيلم رعب لأن كل المجهود التمثيلي المتوقع من الأبطال بين الدهشة والخوف والتردد بدون ترك مساحة لهم لتقديم أداء قوي ومتغير باستمرار. لكن لازم نشيد بدور ريني سوارت و ساندي بورن في أدوار البطولة.

كان ممكن نشعر ببعض المتعة أو الخوف لو كان إخراج الفيلم أكثر اهتمامًا بالمؤثرات الخاصة أو الإضاءة واختيار أماكن التصوير. لكن للأسف في كل مشهد صناع الفيلم كانوا مصرين بتذكيرنا أننا بصدد مشاهدة فيلم منخفض الميزانية مع قصة مكررة وحبكة غير جديدة. وده انعكس على تقييمنا الإجمالي للفيلم.

The Lullaby فيلم غير جيد وتم صناعته باستعجال وبدون رغبة حقيقية في تقديم أي جديد على مستوى القصة أو السيناريو أو الإخراج.

علشان تبقى عارف: تم تصوير جزء كبير من أحداث الفيلم في جنوب إفريقيا.