بما إننا بنشوف أفلام رعب بشكل شبه إسبوعي في السينمات، بقى نادر جدًا نشوف فيلم مختلف. أو بيقدم حبكة أو معالجة جديدة. والسبب أن صناع أفلام الرعب بيستسهلوا وبيقدموا أعمال مكررة. للأسف The Possession of Hannah Grace مابيمثلش أي استثناء.
الفيلم بيحكي عن الشرطية ميجان “شاي ميتشل”، اللي بتشتغل في مشرحة المدينة. في يوم بتستقبل جثة بنت شابة، ماتت أثناء عملية طرد روح شريرة عليها. ولما بينتصف الليل بنكتشف أن الحياة بتدب من جديد في الجثة، وبتتحول لكيان شرير.
من أسوأ الأمور في الفيلم، عدم اهتمام المؤلف “بريان سيف”، أنه يقدم لنا أي خلفيات عن الشخصيات غير حاجات بسيطة. بالتالي مش بنحس بأي تعاطف مع أبطال الفيلم. وبيفضل بس جو الرعب، اللي حاول يقدمه المخرج “ديدريك فان روين” من خلال التلاعب بالإضاءة. وحتى الإضاءة ماعجبتناش، لأنها كانت خافتة معظم الوقت. وده يمكن علشان يداري ضعف الفيلم على مستوى المؤثرات والخدع السينمائية.
كان صعب نحكم على الأداء التمثيلي للأبطال من خلال فيلم رعب. لأن كل المطلوب منهم هو أداء دور الفزع والخوف طوال الوقت. ودي انفعالات بسيطة مانقدرش نحكم على الأداء من خلالها.
فيلم The Possession of Hannah Grace مش بيقدم أي جديد. ممكن تشوفوه بس لو عاوزين تضيعوا شوية وقت.