The Queen’s Corgi
فيلم The Queen’s Corgi: دونالد ترامب في فيلم أنيميشن للأطفال
The Queen's Corgi جاك وايتهول جون كالشو دونالد ترامبأفلام الأنيميشن اللي عندها القدرة على الموازنة بين إنها موجهة للأطفال وبين إنها تعجب وتشد انتباه الكبار كمان مش كتيرة، يمكن علشان كده بتبقى مثيرة للإعجاب، لكن سؤالنا اللي هنجاوب عليه في الريفيو ده هو هل نجح فيلم The Queen’s Corgi في الموازنة دي؟
فيلم The Queen’s Corgi بيحكي عن “ريكس” اللي بيقوم بالأداء الصوتي له “جاك وايتهول” الكلب المرفه اللي بيعيش حياة فاخرة جدًا يمكن مش متاحة لبعض البني آدمين، لكن الظروف بتخليه ينتقل للحياة في ملجأ للكلاب المتشردة، علشان يكتشف الوش الجديد والقاسي من الحياة، واللي أول مرة يقابله ومش متعود عليه، فهل هيقدر يعيش؟
الفيلم كان مركز بدرجة كبيرة على المشاهد اللي بيظهر فيها “دونالد ترامب” واللي قام بالأداء الصوتي له “جون كالشو” والحقيقة إن جون قدر يتقمص الشخصية بشكل مثالي، لكن المشكلة إن الخيط بتاع “دونالد ترامب” يعتبر مناسب أكتر للمشاهدين الكبار، بدون أي اعتبار للمشاهدين الصغيرين، حتى إننا بنشوف مشهد قصير جدًا لزجاجة كوكاكولا بتتحط لترامب وفي غلطة إملائية واضحة من اللي مشهور بيهم ترامب في كلامه على موقع تويتر مكتوبه على الزجاجة، فياترى هل ممكن يكون ده مشهد موجه لطفل صغير؟
النقطة هنا هي إن الفيلم كان أحيانًا بينسى “الموازنة” اللي كان المفروض تكون موجودة، وكان بينحاز شويه للمشاهدين الكبار، وشويه للمشاهدين من الأطفال، والنتيجة النهائية في رأينا كانت إحباط للطرفين.
لكن الناحية التانية لا يمكن ننكر إن الفيلم كان فيه مشاهد حلوة لكن القوة الحقيقية للفيلم كانت في السيناريو وتقلباته وفكرة الانتقال من حياة مرفهة لحياة صعبة، ودي حبكة بيطلع منها كوميديا متميزة طول الوقت مش بس في حالة The Queen’s Corgi.