The Definitive Guide to Living in the Capital , Cairo , Egypt

لما تكونوا بتتفرجوا على فيلم رعب من حقكم تقتنعوا أو لأ.. يعجبكم أو لأ.. لكن لو الموضوع قلب بضحك وحسيتوا إنكم في فيلم كوميدي من النوع الرديء يبقى ساعتها ممكن تتأكدوا إن الفيلم اللي بتتفرجوا عليه فيلم فاشل!

فيلم The Terror of Halloween بيحكي عن شاب بيتعرض لمشاكل نتيجة تنمر مجموعة من أصحابه عليه، وفي ليلة من الليالي الغريبة بيقرر يتمنى أمنية، وهي إن العقاب يحل عليهم كلهم، من غير ما يعرف إن أمنيته هتتحول لحقيقة مرعبة، وهيكون عنده القدرة إنه ينتقم بشكل سحري من أي حد يضايقه.

القصة كتبها وأخرجها “تود تاكر” وللأسف مكررة وشوفناها في أفلام كتير، لكن مش ده السيئ في الفيلم، الأسوء من تكرار القصة هو الفشل في تنفيذها، يعني بنشوف مؤثرات خاصة أقرب لمسرحيات الأطفال منها للمؤثرات الحقيقية، بالإضافة لأداء تمثيلي أكتر من ضعيف.

في بعض المشاهد بيحاول الفيلم يقدم لنا بعض المشاهد المرعبة من خلال ظهور كائنات أو أشخاص بشكل مفاجئ ومن جانب الكادر علشان نحس بالرعب، لكن حتى المشاهد دي كانت ضعيفة ومش هتعمل حاجة غير إنها هتخليكم تضحكوا بشكل هستيري، وعلى الرغم من أن إنتاج فيلم رعب من النوعية دي مش محتاج في الغالب ميزانية كبيرة، أو خبرة كبيرة في الإخراج، لكن حقيقي مش عارفين ازاي انتهى الموضوع بصناع The Terror of Halloween إنهم يقدموا العبث ده.