The Definitive Guide to Living in the Capital , Cairo , Egypt

أفلام الرعب لها أكتر من طريقة علشان نقدر نسميها أفلام رعب فعلًا. بعضها بيعتمد على أسلوب الرعب بالخضة أو الـ Jump scare، وبعضها بيعتمد على الرعب المعوي المعتمد على مشاهد القتل أو التعذيب (زي سلسلة أفلام SAW). لكن واحد من نوعيات أفلام الرعب النادرة نسبيًا، هو الرعب القائم على أسباب نفسية. أو شعور المشاهد بالخوف من حاجة معينة مش مفهومة. أو سيطرة شعور عام عليه أن (فيه حاجة غلط هنا) بدون ما يكون هناك رعب مباشر. وهو ده الطريق اللي مشي عليه صناع The Twin.

The Twin بيحكي عن أب وأم بيواجهوا موقف صعب جدًا. وهو فقدان واحد من الأبناء التوأم لهم في حادثة بشعة. وعلشان تقدر الأم تنسى اللي حصل بيقرروا الانتقال لبلد تانية ومنزل تاني. وهناك بتبدأ مجموعة من الأحداث الغامضة والمرعبة، اللي لها علاقة بالتوأم الميت.

على الرغم من نهج الرعب المُختلف اللي بيمشي عليه The Twin إلا أن المخرج  تانيلي موستونين – واللي شارك في تأليف الفيلم كمان- كأنه بيقول لنا: كفاية عليكم اني بقدم تيمة رعب نادرة. هقدم في المقابل أحداث قليلة وقابلة للتوقع وميزانية قليلة.. وكأن تيمة الفيلم لوحدها ممكن تخليه ينجح!

أحداث الفيلم زي ما قولنا مش كتير. وزمن الفيلم طويل نسبيًا، وده خلانا نحس أن الأحداث ممطوطة وبتدور في دايره مفرغة. كمان قدرتنا على توقع الأحداث من البداية للنهاية ساهمت في شعورنا المتزايد بالزهق من اللي بنشوفه. لكن مانقدرش ننكر أن تصميم المشاهد والتلاعب بالاضاءة وزوايا التصوير كان رائع ومرعب فعلًا في بعض المشاهد.

اللي ساعد على شعورنا بالخوف في بعض المشاهد هو الأداء التمثيلي المميز من تيريزا بالمر في دور الأم (راشيل) و ستيفن كري في دور الأب. وفي الماستر سين قرب نهاية الأحداث بنشوف سيمفونية تناغم في الأداء بين الاتنين بشكل رائع. وطبعًا بدون ما ننسى دور الطفل تريستان روجيري اللي قدمه بشكل رائع.

في زمن من النادر أننا نشوف فيلم رعب مبتكر أو بيقدم فكرة جديدة. فيلم The Twin حاول بجد أنه يقدم أي جديد. لكن للأسف النتيجة النهائية هو رعب متواضع وفكرة محروقة لمعظم المشاهدين. مع احترامنا للتيمة اللي مش بيستخدمها كل صناع أفلام الرعب. لكن ليس بالتيمة وحدها تنجح الأفلام.