The Definitive Guide to Living in the Capital , Cairo , Egypt

على الرغم من تصنيفه كفيلم رعب، بس إحنا ماشوفناش فيلم Underwater على إنه فيلم رعب، وشايفين إن تصنيفه الأصح هو فيلم “إثارة وتشويق”.

فيلم Underwater بيحكي عن مجموعة من الباحثين موجودين في معمل تحت الماء، لكن زلزال كبير بيحصل بيدمر المكان وبيجبرهم على محاولة الوصول للأمان بأي ثمن، لكن المشكلة إن فيه كيان أخطر بكتير من الزلزال مستنيهم، فياترى هو إيه الكيان ده؟ وإيه اللي هيحصل؟

على الرغم من إن القصة ممكن تدينا إيحاء بإنه فيلم مرعب، لكن المخرج “وليام إيوبانك” اختار إنه ياخد الفيلم في اتجاه الإثارة أكتر، علشان كده مش بنشوف (خضات) أو jump scares كتير في الفيلم، لكن السلبي فعلاً كان قرار “وليام” إنه يقدم كمية كليشيهات كبيرة جدًا في الفيلم.

من أول مشهد لآخر مشهد هتحسوا إنكم بتشوفوا مقاطع من أفلام رعب كتير زي A Quiet Place وThe Descent و Aliens وغيرها من الأعمال، ولو كان المخرج اعتمد على نفسه وقدم الفيلم بدون الاقتباسات دي كان هيكون أفضل بكتير.

صعب نحكم على الأداء التمثيلي في فيلم إثارة، لإن الانفعالات المطلوبة من الأبطال مش بتكون كتير، لكن صعب برضو ننكر إن “كريستين ستيوارت” قدمت دور ممتاز، وهي من الممثلات المجتهدات اللي بيشتغلوا على نفسهم وشكلهم علشان يناسب أي دور يقوموا بيه، وده ساهم بجزء كبير من نجاح الفيلم، خاصةً إنها حلقت شعرها علشان تقدم دور مقنع.

الحقيقة إن باقي أبطال الفيلم هما كمان عملوا أدوارهم بشكل كويس، لكن سيناريو الفيلم للأسف ماسمحش لهم بأي تميز، يعني كل شخصية كانت بتدور في المحاور المرسومة ليها بالظبط، لدرجة إن أي حد عنده ثقافة سينمائية بسيطة جدًا يقدر يستنتج كل واحد من الأبطال موجود هنا ليه، سواء الشخصية الكوميدية اللي بتلطف الأحداث أو الشخصية النسائية اللي بتقع في حب الشخصية البطلة أو الجريئة.. وهكذا.