The Definitive Guide to Living in the Capital , Cairo , Egypt

على الرغم من بساطة بعض قصص الأفلام، لكنها بتقدر تاخدك لعالم سحري جميل وتشجعك على المشاهدة من البداية للنهاية، فيلم Up and Away من الأفلام دي، لكن برضو الأمر ما يخلاش من بعض العيوب اللي هنتكلم عنها دلوقتي.

فيلم Up and Away بيحكي عن “هودجا” الطفل الصغير اللي بيستعير بساط سحري من بائع سجاد، البساط عنده القدرة على الطيران، وبائع السجاد قرر يدي “هودجا” البساط مقابل إنه يلاقي بنته اللي أضطر يسيبها وهو هربان من السلطان الشرير.

زي ما قولنا، القصة متوقعة والسيناريو اللي كتبه وأخرجه “كارستن كايليريتش” مافيهوش عقد كتير أو ألغاز صعب الواحد يفهمها، وبالتالي أي طفل من سن سنتين أو ٣ سنين يقدر يتابع الفيلم بدون مشاكل.

لكن من ناحية تانية، يعيب “كارستن كايليريتش” ضعف الإنتاج اللي أثر على جودة الرسومات، وخلانا نحس إننا قدام  فيلم منتج من التسعينات مش فيلم حديث، كمان السيناريو كان مفتقر لكمية جيدة من الكوميديا أو الاستعراضات الكثيرة والمبهرة، وده هيخلي المشاهد مضطر يتابع خيط درامي واحد بس بيمتد من بداية الفيلم لنهايته، يعني مفيش أي تويستات في الأحداث.

الأداء الصوتي لأبطال الفيلم “توري ليندهارت” و”بيتر فرودين” وباقي الأبطال كان جيد، وكل صوت تم توظيفه في شخصيته الصحيحة والمناسبة، لكن زي ما قولنا كنا محتاجين شخصيات أكتر ومواقف كوميدية أكبر علشان نحس إن الفيلم ينفع لأي عمر مش بس للأطفال.