The Definitive Guide to Living in the Capital , Cairo , Egypt

عارف لما تبقى رايح تقدم على شغل جديد، وعندك خبرة كويسة جدًا واشتغلت في كذا مكان قبل كده، والـ C.V. بتاعك ماحصلش. بس تترفض علشان أنت overqualified؟ أهو ده اللي حسيناه مع “توم هادري” في الفيلم. بس المختلف إنه ماترفضش، وعمل الفيلم.

فيلم Venom بيدور عن صحفي التحقيقات إيدي بروك “توم هاردي”، اللي بيكتشف إن مؤسسة life المتخصصة في علوم الفضاء، وبيديرها الدكتور كارلتون دريك “ريز أحمد”، بتقوم بتجارب على البشر مخالفة للقانون. وبيروح ضحيتها ناس كتير أبرياء. ولما بيقتحم بروك المعمل بتاع دريك علشان يحاول يكشف تجاربه. بيتعرض لسيطرة كائن فضائي اسمه “سيمبيوت” بيخليه يتحول للوحش “فينوم”.

من ساعة ما شوفنا التريلر، وإحنا مستنيين بفارغ الصبر نشوف “توم هاردي” هيقدملنا إيه في الفيلم ده. علشان إحنا اتعودنا منه على أدوار بتعلم في دماغنا ومانقدرش ننساها. منها على سبيل المثال دور “Bane” في “Dark Knight Rises”، أو “Max” في “Mad Max: Fury Road”. لكن في الحقيقة شوفنا فيلم عادي وفيه شوية ملل. كان ممكن أي حد تاني يعمل الدور ده عادي، يمكن ساعتها كنا حسينا إنه أحلى شوية.

تنبيه.. السطور اللي جاية فيها حرق لبعض الأحداث.

أول ظهور لشخصية “فينوم” كان في فيلم “Spider-Man 3” في 2007، كانت هي الـ Villain أو الشرير. وده كان مخلينا بنسأل إيه اللي هيحصل في الفيلم ده، هل هيخلوا الشر هو اللي ينتصر؟ لكن أتفاجأنا إن فينوم بقى هو الخير، وبيواجه “ريوت”. وده وحش فضائي زي فينوم لكن هو اللي بيمثل الشر.

وبعدين فيه شوية حاجات مش منطقية مافهمناهاش. زي مثلًا إن الـ “سيمبيوت” لما يدخل جسم إنسان ومايتطابقش معاه، بيخليه يموت. فلما خرج من جسم إيدي ودخل جسم الكلب، وبعدين دخل جسم آني “ميشيل ويليامز” علشان تروح تنقله تاني لإيدي، ماحصلش حاجة وعادي يعني. أو لما أكتشفنا إن فينوم عايز يحمي كوكب الأرض، ويمنع غزو الفضائيين لها، لمجرد إنه حب المكان. بجد؟ وجرعة الضحك الزيادة عن اللزوم في الفيلم، خليته بقى فيلم كوميدي مش فيلم سوبر هيروز وأكشن. مافهمناش كانوا عايزين إيه بالظبط.

بس مانقدرش ننكر إن الفيلم فيه شوية أكشن حلوين جدًا. خصوصًا مشهد مواجهة فينوم لأفراد الشرطة. لما قضى على فريق كامل لوحده. أو المعركة الأخيرة بين فينوم وريوت.

“توم هاردي” طبعًا تمثيله فوق الوصف، لكن طول الوقت حاسين إنه يستاهل حاجة أحسن من كده، أو دور أصعب من كده. لكن مش ده. “ميشيل ويليامز” عدت كده علينا خفيف خفيف. اللي هو بتظهر وقت ما حبكة الفيلم تطلب، وبعدين تختفي. أما اللي فعلًا حسيناه أقل من المستوى هو “ريز أحمد”، اللي لعب دريك. وهو اللي بقى ريوت في الآخر. دي مش ملامح ولا أداء شخص شرير. تعبيراته كلها واحدة مابتتغيرش، وهو “كيوت” أوي على أنه يبقى شرير. في العموم تجربة Venom ماكنتش أحلى حاجة. يمكن أحسن ميزة في الفيلم “توم هاردي”.