The Definitive Guide to Living in the Capital , Cairo , Egypt

على الرغم من إنها مجرد دولة واحدة، لكن الولايات المتحدة الأمريكية قدرت تربط بين تغير سياساتها وبين تغير سياسات كتير من دول العالم. بالتالي لما نتكلم عن نائب رئيس الولايات المتحدة، إحنا هنا مش بنتكلم عن نائب رئيس دولة عادية. خاصة لو كان اسم النائب ده هو ديك تشيني.

فيلم Vice بياخدنا لجولة في حياة نائب الرئيس الأمريكي ديك تشيني (بيلعب الدور كريستان بيل). وعجبنا في القصة اللي كتبها وأخرجها أدم مكاي أن القصة مش بتظهر نائب الرئيس كملاك أو شيطان. لكن كإنسان له أخطاء وحسنات. وفي الحالتين الفيلم مهتم بسرد القصة على العكس من أهتمامه بالحكم الأخلاقي أو السياسي على بطل العمل.

كريستان بيل كالعادة بيقدم أداء تمثيلي متميز. سواء على صعيد الشكل أو المضمون. والمميز في تمثيله هو قدرته على التوحد مع الشخصية على مدار عمرها المختلف وتقديمها من منطلق نفسي بحت مش مجرد تماثل شكلي.

الفيلم بيضم كوكبة ممتازة من الممثلين بنشوف إيمي آدمز في دور ليني تشيني وستيف كاريل في دور دونالد رامسفيلد. وكلهم أدائهم متميز. أما الأداء الأضعف فكان من نصيب سام روكويل في دور جورج بوش الإبن. وحسيناه مش قادر (يمسك) الشخصية بشكل صحيح وقدم أداء باهت وضعيف. كان ممكن يمر في الأفلام العادية. لكن مع أسماء زي اللي ظهرت في الفيلم كان واضح الأداء الضعيف لسام.

فيلم Vice هيعجب المتابعين للسياسة الأمريكية في الفترة الأخيرة. والناس اللي بتحب تعرف أكتر عن كواليس عالم السياسة في أقوى دولة في العالم.

علشان تبقى عارف:  تقييم الفيلم على موقع IMDb هو 7.2 من 10.