The Definitive Guide to Living in the Capital , Cairo , Egypt

 لسه فاكرين لحد النهارده أفيش فيلم “معالي الوزير” بطولة “أحمد زكي” لما حطوا اسم الفنانة “يسرا” وصورتها علشان تظهر كإنها بتشارك أحمد زكي البطولة، لكن الحقيقة إنها كانت ضيفة شرف في الفيلم.

هو ده اللي حصل في فيلم We Die Young واللي دخلناه على أساس إنه من بطولة “فان دام” لكن الحقيقة إن البطل مكانش فان دام!

فيلم We Die Young بيحكي عن تورط 2 من الشباب الصغيرين في عالم تجارة المخدرات في الشوارع الخلفية لواشنطن العاصمة، وفي محاولة هروبهم من العصابة بيساعدهم جارهم “دانيال” واللي قام بدوره “فان دام” واللي له ماضي عسكري غامض أثناء المشاركة في الحرب الأمريكية الأفغانية.

زي ما قولنا، مساحة دور “فان دام” أو حتى المشاهد العنيفة اللي بيقوم بيها لا تتعدى 1٪ من الفيلم ككل، وده خلانا نحس إننا اتضحك علينا وكان المفروض يتقال لنا إن “فان دام” مش هو بطل الأحداث.

صحيح قوة أحداث فيلم “معالي الوزير” خلتنا نعدي ونقبل موقف زي ده، لكن في الحقيقة We Die Young ماقدمش لنا أحداث قوية أو قصة مترابطة، وحتى فشل في تقديم أكشن كويس أو سيناريو محبوك بشكل جيد، ودي كانت غلطة المخرج والمؤلف “ليور جيلر”.

يمكن الحاجة الوحيدة المختلفة في الفيلم هي قدرته على تجسيد عالم الشوارع الخلفية لمدينة واشنطن، ودي تعتبر من المرات النادرة اللي بتظهر فيها واشنطن كمدينة جرائم وتجارة مخدرات مش عاصمة جميلة وحديثة زي ما متعودين نشوفها.