The Definitive Guide to Living in the Capital , Cairo , Egypt

بننتظر الأفلام العربية اللي بيتم طرحها في الموسم السينمائي بعيدًا عن فترات الأعياد والأجازات بفارغ الصبر علشان بتكون زي (تصبيرة) تعطينا جرعة أمل في اللي ممكن نشوفه في فترة الأعياد، لكن للأسف فيلم (كارت ميموري) كان تصبيرة سيئة إلى درجة كبيرة. تعالوا نتعرف أكتر على تجربتنا معاه.

القصة

الفيلم بيحكي عن محامي شاب بيعيد الربط بين مجموعة من القضايا اللي تم الحكم فيها بالإعدام اعتمادًا على معلومات بيجدها على كارت ميموري، الأمر اللي بيقوده لشبكة من العلاقات والأحداث اللي تتسم بالغموض والأثارة.

فريق العمل

الفيلم من إخراج خالد مهران ومن تأليف محمود فليفل ومن بطولة خالد سليم وأحمد منير ودينا فؤاد ومحمد نجاتي وعزت أبو عوف ورانيا محمود يس.

الأداء التمثيلي

على الرغم من مشاركة أسماء كبيرة في عالم التمثيل إلا أن الأداء التمثيلي لأبطال الفيلم كان ضعيف وكان محتاج يكون أقوى من اللي شوفناه على الشاشة، ولكن الأداء التمثيلي كان مظلوم بسبب عوامل ضعف الفيلم التانية زي السيناريو والحوار والإخراج واللي كان لازم يكونوا أفضل من كده.

السيناريو والحوار والإخراج

سيناريو الفيلم كان ضعيف وكان محتاج يكون أقوى، وترك السيناريو عبء إدارة الأحداث بالكامل على الحوار اللي على الرغم من قوته ماقدرش يستحمل عبء التحرك الدرامي في الأحداث، وده في النهاية كان خطأ المخرج اللي ماقدرش يدير ممثليه بالشكل المناسب علشان يقدم في النهاية فيلم قوي.

الديكورات والموسيقى والأزياء

على الرغم من أن معظم مشاهد الفيلم تم تصويرها في ديكورات داخلية لكن مستوى الديكورات كان ضعيف وكان محتاج يكون أفضل، وبشكل عام مستوى الفيلم بالكامل كان أقل من المستوى اللي كنا متوقعينه.

الخلاصة: كارت ميموري كان ممكن يكون فيلم أفضل لو تم الاهتمام به إنتاجيًا وإخراجيا أكتر.

علشان تبقى عارف:

خالد سليم بطل الفيلم من مواليد الكويت سنة 1975 ثم انتقل لمصر وبدأ يدخل عالم الغناء والطرب بشكل محترف بداية من سنة 2000 تزامنًا مع طرح ألبومه بعنوان عالم تاني. ثم اقتحم عالم الفن والتمثيل سواء للسينما أو للتليفزيون.