كدبة بيضا (مصركاني)
كدبة بيضا (مصركاني): قصة قوية وتمثيل مميز
أفلام جديد في السينما سينما فيلم كوميدي قاعات عرض كدبة بيضا مصركاني ناهد السباعي نقد سينما نور أرناؤوطمشكلات وتعقيدات كتير صاحبت إنتاج وتقديم فيلم كدبة بيضا للسينمات المصرية. منها تغيير بطلة الفيلم من سارة سلامة الى ناهد السباعي، ودور البطولة اللي كان المفروض يروح للفنان أحمد عز لكن ارتباطه بتصوير فيلم تاني منعه من قبول الدور. وأخيرًا تشابه الفيلم – في الإسم – مع فيلم لبناني تاني.
لكن الحقيقة أن كدبة بيضا قدر يتجاوز مشاكله ويقدم لنا كوميديا مختلفة مع معالجة قوية لقصة اختلاف الثقافات والحضارات. تعالوا نتناول كدبة بيضا بتوسع أكتر.
كدبة بيضا بيحكي عن شاب مصري عايش في أمريكا بيقرر يتجوز بنت أمريكية ويعيش معاها في مصر. الأمر اللي بيخلق سلسلة لا تنتهي من المواقف الكوميدية اللي بتستمر على مدار أحداث الفيلم.
في البداية كنا حاسين بلخبطة. مخرجة الفيلم نور أرناؤوط سورية. والفيلم فيه ممثلين مصريين وسوريين. والفيلم بيتعرض في مصر. كل الجنسيات والدول دي كانت عاملة لنا لخبطة. لكن في النهاية الفيلم كان قوي ومتميز ونسينا كل خليط الجنسيات ده مع استمرار الأحداث.
الأداء الفني لسامي الشيخ كان قوي ومميز واحترافي جدًا. والمميز أن سامي عايش بالفعل بين مصر وأمريكا. بالتالي تأديته للدور كان إلى حد بعيد معتمد على جزء كبير من حياته الشخصية. سامي شارك في أعمال أمريكية زي The Big Bang Theory و Transformers : Dark of the Moon وفي مصر شارك في مسلسل حكايات بنات وغيرها من الأعمال.
وعلشان الأمور تكون مظبوطة كان لازم يتم الاستعانة بوجه مصري أصيل في البطولة النسائية. هنلاقي مين أحسن من ناهد السباعي بمصرية ملامحها وطريقة كلامها وأدائها؟ خاصة أن ناهد بتعرف تأدي أي شخصية مطلوبة منها باحترافية عالية وكفاءة كبيرة.
تأليف لؤي السيد للفيلم بالمشاركة مع مخرجة الفيلم نور أرناؤوط قدم قصة متوازنة وجيدة. وعلى الرغم من أن الحبكة تم تقديمها في أعمال تانيه كتير. لكن التركيز عليها كحبكة أساسية أعطى للفيلم خصوصية. وجعل المواقف الكوميدية متوظفة بشكل جيد وأكثر امتاعًا وإقناعًا.
كدبة بيضا فيلم جيد عن اختلاف الثقافات بين مصر وأمريكا بشكل كوميدي. ننصح بمشاهدته لمحبي الكوميديا المبنية على مواقف مكتوبة كويس.
علشان تبقى عارف: الفيلم يعتبر أول فيلم ينتج في مصر لمخرجة سورية.