The Definitive Guide to Living in the Capital , Cairo , Egypt

فيه ناس ممكن تحس بالإثارة لمجرد إنها دخلت بيت الرعب في الملاهي، وناس تانية بتحتاج جرعة أكشن أكبر بكتير علشان الأدرينالين يتدفق في جسمها بلا توقف. ومن الناس دي ساشا، اللي بتقوم بدورها تشارليز ثيرون في أحدث أفلامها Apex. لكن مش كل مغامرة بيدخلها الإنسان هيرجع منها سليم!

فيلم Apex بيحكي عن متسلقة جبال ومغامِرة محترفة اسمها ساشا، بتتعرض لحادثة مأساوية مش عايزين نحرق أحداثها عليكم، وبعدها بفترة بتقرر ترجع تاني لحياة المغامرة اللي مش بتقدر تبعد عنها. لكنها بتلاقي نفسها فجأة في مواجهة قاتل مهووس، بيحاول يقتلها بأي ثمن. فهل هتقدر تهرب منه؟ وإيه التمن اللي المفروض تدفعه علشان تنجو بنفسها؟

على الرغم من فكرة الفيلم النمطية، وقدرة أي مشاهد عنده خبرة ولو بسيطة بأفلام الهروب من القاتل المحترف على إنه يستنتج كل أحداث الفيلم بعد ربعه الأول تقريبًا، إلا إن Apex بيطرح فكرة فلسفية شوية: هل الخطر الحقيقي متمثل في الطبيعة؟ زي رياضة تسلق الجبال أو السباحة في الأماكن الخطيرة؟ أم أن الخطر الحقيقي الأشد قوة هو الإنسان نفسه لما يفقد عقله ويتحول إلى آلة قتل بتحط خطط شريرة لإيقاع ضحايا حاسين بالأمان النسبي؟

الأداء التمثيلي لتشارليز ثيرون في الفيلم لا يُعلى عليه، وده مش غريب على ثيرون اللي عملت أفلام زي Atomic Blonde وسلسلة أفلام The Old Guard، ده غير مشاركتها المرتقبة في الفيلم اللي كلنا مستنيينه The Odyssey. لكن إحقاقًا للحق، الشخصية اللي بتقدمها ثيرون في الفيلم شخصية نمطية، ومش بنتوقع منها تعبيرات كتير غير الهلع والغضب مثلًا، بينما تارون إيجرتون بيقدم شخصية مُركبة ومعقدة، ونجح في تأديتها بشكل عظيم.

المخرج بالتاسار كورماكور ممكن نقول إنه من المخرجين الشاطرين في إخراج الأفلام اللي لها علاقة بالبيئات الصعبة زي الجبال والأنهار، وسبق وأخرج لنا فيلم Everest سنة 2015 وحقق نجاحًا كبيرًا. وهو هنا بيرجع تاني للمعادلة اللي شاطر فيها، فيلم فيه صراع ضد الإنسان وضد الطبيعة في نفس الوقت.

لو بتدور على فيلم مسلي، تقضي قدامه حوالي ساعتين من المتعة والإثارة من أول مشهد لآخر مشهد، ومتاح على نتفليكس ومحقق معدلات مشاهدة عالية، فممكن نقول إن فيلم Apex هيكون الصفقة المثالية ليك.

أما لو عايز فيلم فيه حبكة ملتوية (Plot Twist) وأفكار فلسفية عميقة وحوارات درامية قوية، فـ Apex مش الفيلم المناسب في الحالة دي.